Izoh.uz лойиҳаси ҳақида

Izoh.uz — Ўзбек тилининг халқона изоҳли луғати 35 000 дан ортиқ сўзларнинг маънолари ибора ва мисоллар билан келтирилган.

Йиллар давомида “Ўзбек тили куни”га бағишлаб, ўзбек тилини ўрганувчилар, журналистлар, таржимонлар, копирайтерлар, блогерлар ва бошқалар учун фойдали лойиҳаларни ишга туширишни анъанага айлантирганмиз. Бизнинг жамоа Lotin.uz, Imlo.uz, Sinonim.uz, Sarlavha.com лойиҳаларини ҳукмингизга ҳавола қилган.

Бу йил эса “Izoh.uz” лойиҳасини тақдим этамиз. Ушбу лойиҳани амалга оширишда ўз қимматли таклифлари билан “Savodxon.uz” жамоаси ва бир қанча фаол ўзбек тили фидойилари иштирок этишди. Шу жумладан сўзлар, иборалар, ўзлашма ва байналмилал терминларни йиғишда интернет саҳифалари, ижтимоий тармоқлар, Wikipedia, телеграм каналлар, айниқса “Грамотные тексты в Узбекистане” телеграм гуруҳи ва бошқа турли хил манбалардан фойдаланилди.

Айтиш мумкинки, бу нафақат оддий изоҳли луғат, балки фойдаланувчилар томонидан тўхтовсиз тўлдириб бориладиган, том маънодаги "тирик" халқона изоҳли луғатдир. У деярли ҳар куни, кундалик турмушимизга кириб келаётган интернет ва ахборот технологиялари, автомобиль саноати, дизайн, мусиқа, қишлоқ хўжалиги, илм-фан, техника, маданият ва саноатнинг бошқа барча йўналишларига оид янги, ҳамда классик адабиётимиздаги унитилаётган сўзлар билан тўлдириб борилади.

Албатта, иш бор жойда, хато бўлади. Биз жамлаган маълумотларни “абсолют ҳақиқат” деб билмасдан, уларга танқидий ёндошиб, мустақил равишда текширган ҳолда ўз фикр-мулоҳазаларингизни беришингизни сўраймиз.

Асосий афзалликлар:

• янги сўз, термин ва атамаларга зудлик билан изоҳ ва тавсиф бериб борилиши;
• маълумотлар ўзбек тилининг кирилл ва лотин алифбосида берилганлиги;
• компьютер ва телефондан фойдаланишнинг қулайлиги;
• ҳарфлар бўйича навигациянинг мавжудлиги;
• қулай қидирув тизими орқали ёзилаётган матнга керакли сўзни топиш тезлигини ошириш имконияти.

Сайтдаги сўзларнинг маъноларини янада чуқурлаштириш ва хатосиз қилиш учун биз таклифлар учун ҳар доим очиқмиз. Ўзбек тилига бефарқ бўлмаганлар, ҳар биз сўзга янада тушунарлироқ бўлган изоҳлар ва мисолларни қўшиб боришлари мумкин.

Бу билан сиз бир томондан, ўзбек тилининг қанчалик бой эканлигининг шоҳиди бўлиб борасиз, иккинчи томондан, ўзингизни фаол иштирокингиз билан она тилимизни янада ривожлантиришга баҳоли қудрат хизмат қиласиз.

Ўзбек тили билан боғлиқ турли хил дастурлар, сунъий интеллект ва бошқа машғулот билан банд дўстларимизга эса ҳамкорлик қилишни таклиф қиламиз. Бирлашган — ўзар.