Izoh.uz saytida jon so‘zining izohi va ma’nolari

jon

So‘zni do‘stlar
bilan ulashing

1. Diniy-ibtidoiy tasavvurlarga koʻra, inson va hayvon tanasida boʻladigan, uyqu chogʻida (vaqtincha) yoki oʻlgan vaqtda tanadan chiqib ketadigan alohida koʻzga koʻrinmas ilohiy kuch, quvvat; ruh.

Jon bor joyda qazo bor. Maqol
Odamning loydan yasalishini, unga jon bagʻishlanishini shunday qiziq qilib oʻqib berdiki A. Qahhor, Qoʻshchinor chiroqlari

2. Sezuvchi, his etuvchi tan, badan.

Butun jonim qaqshab ogʻriyapti. Tish ogʻrigʻim bosilib, jonim orom oldi. Betimning qalini —
jonimning huzuri. Maqol
Tim qorongʻi, izgʻirinli kecha. Yomgʻir xuddi jonga igna sanchganday, ezib, muttasil savalardi. Oybek, Quyosh qoraymas
Gʻulomjon ayvonda otasi bilan turar, stollarning qarsillatib sindirilayotganini eshitib, xuddi oʻz qovurgʻalari sindirilayotgandek, joni ogʻrir edi. M. Ismoiliy, Fargʻona tong otguncha

3. Hayot; hayot-mamot; tiriklik.

Kemaga tushganning joni bir. Maqol
Echkiga jon qaygʻu, qassobga yogʻ qaygʻu. Maqol
Jondan kechmasang, ish bitmas. Maqol
Chechak Jambul, sen Vatanni sevasan, Kerak boʻlsa, joningni ham berasan. Fozil shoir.
Otam meni jonidan ortiq koʻrar edi. M. Ismoiliy, Fargʻona tong otguncha

4. Kishi, odam.

Jon boshiga. Biz toʻqqiz jon edik.
Qorabuloq qishlogʻida birorta uygʻoq jon qolmagan edi. M. Ismoiliy, Fargʻona tong otguncha
Hech bir jon yoʻqki, oni boʻlmasa jononasi. Hamza
Hamma ishni toʻxtatib, qimirlagan jonni terimga solar ekanmiz. N. Safarov, Hayot maktabi

5. Bir qator aniqlovchilar bilan qoʻllanib, bosh, jussa maʼnolarini ifodalaydi.

Qiz joning bilan qayergacha borolarding? I. Rahim, Chin muhabbat
— Yosh joning bor, qizim, — dedi [Oftob oyim], — birovga yomonlik sogʻinma. A. Qodiriy, Oʻtgan kunlar.|| — Voy shoʻrim, — dedi Mastura. —
Jindakkina joningizga-ya? Shu jussangizga uchta dard sigʻadimi? A. Qahhor, Ming bir jon

6. Kuch, quvvat, mador.

Joni boricha harakat qilmoq. Tezroq qimirlasang-chi, joning bormi?
Hoji sekingina qoʻlini uzatib, qulogʻini ushladi va uch buklab turib qattiq qisdi, joni boricha qisdi. A. Qahhor, Yillar
Joni boricha ikki qoʻlidagi etik bilan eshikni qamchiladi. H. Nazir, Soʻnmas chaqmoqlar

7. Yaxshi koʻradigan, sevimli, yoqimli kishi yoki narsa haqida.

Olma —uning joni. Jon doʻsting jonidan kechsa ham, mol doʻsting molidan kechmas. Maqol
Ammo lekin Muxtorxon domla nafsambiriga odamning joni edi. A. Qahhor, Toʻyda aza

8. Eng yaqin, sevikli kishilarga murojaatda soʻzlovchining ularga yaqin munosabatini ifodalaydi, begonalarga nisbatan esa hurmat yoki xushomadni bildiradi.

Jonim, dedim qulogʻiga, ohista, jon, dedi. Qoʻshiqlar
Gulnorning koʻzlari ochilib ketdi Yoʻlchiga tikildi. — Nima qildi, jonim, — soʻradi Yoʻlchi, lekin betobmisiz deyishga tili bormadi. Oybek, Tanlangan asarlar
[Jamila Gʻofirga:] Agar oʻtirgan joyingizga xas-xashaklar toʻkilsa, sochlarim bilan supuray jonginam. Hamza, Boy ila xizmatchi.

9. “Opasi”, “akasi”, otasi va shu kabilar soʻzlar bilan, baʼzan yolgʻiz jonidan shaklida soʻzlovchining tinglovchiga yaqin munosabatini, erkalash yoki xushomad maʼnolarini ifodalaydi.

— Opasi jonidan, dutoringizni chaling tuzukroq, — dedi u [Malikaxon] Adolatga qarab,— oʻyin-kulgiga tashna boʻlib yotganmiz. S. Zunnunova, Gulxan

10. Hayot manbai, hayot bagʻishlovchi narsa haqida.

Yomgʻir — ekinning joni.
Issiq — paxtaning joni degan maqol ham bejiz aytilmagan. Sh. Rashidov, Gʻoliblar

11. Biror ish, soha yoki doirada asosiy, muhim oʻrin egallovchi, ilhomlantiruvchi, tashkilotchi shaxs.

Joʻralarining joni. Davraning joni. Maktabning joni.

12. Murojaat qilinayotgan shaxsni bildiruvchi soʻzdan oldin kelib, murojaatdagi iltimos, iltijo maʼnosini kuchaytiradi, baʼzan erkalash maʼnosini bildiradi.

Niyoz men bilan xayrlashar chogʻida: — Jon Hoji aka! Endi gap shu yerda qolsin — dedi. A. Qodiriy, Oʻtgan kunlar
— Urmang otamni! Jon amaki, urmang! — deb zor yigʻlay boshladi bolalar. M. Ismoiliy, Fargʻona tong otguncha

13. Shaxs bildiruvchi soʻzlarga, kishilar otiga qoʻshilib, ularga kichraytish-erkalash, hurmat maʼnosini beradi, masalan,

onajon, buvijon, xolajon, akajon, domlajon; Salimjon, Qodirjon

14. kesim vzf. Shukur.

Ofitserning shu ketishi boʻlsa, shtabga yetib borsa ham jon. A. Qahhor, Oltin yulduz

jon soʻzi qatnashgan jumlalar:

Jon bermoq

1. Vafot etmoq, oʻlmoq.

Vafot qildi jonkashim, dardkashim. Hozir qoʻlimda jon berdi. Oybek, Tanlangan asarlar

2. koʻchma Taslim boʻlmoq, kurashni, qarshilikni toʻxtatmoq.

Yoʻq, Xoʻjabekovga oʻxshaganlar osonlikcha jon bermaydi. Yotib qolguncha otib qoladi. S. Anorboyev, Oqsoy

3. koʻchma Astoydil xizmat qilmoq, fidoyilik qilmoq.

Musulmonlar! Yaxshi deb yoʻlida jon berganing Azizbek bu kun sizlarga yaxshiligingizni oʻttiz ikki tanga soliq bilan qaytarmoqchi boʻldi. A. Qodiriy, Oʻtgan kunlar

Jon kirmoq

1. Tirilmoq.

Baliqqa jon kirdi;

2. koʻchma Jonlanmoq, ruhlanmoq, qizimoq.

Qutidor qaytib yoʻlakka kirishi bilan Oftob oyim ila Kumushga qaytib jon kirgan kabi boʻldi. A. Qodiriy, Oʻtgan kunlar
Tabiatga jon kirdi, tollar barg chiqardi. J. Sharipov, Xorazm

Jon olmoq

1. Oʻldirmoq.

Men oʻzimning ashaddiy dushmanim bilan tanho kurashib, yo jon bermoqqa va yo jon olmoqqa qaror bergan edim. A. Qodiriy, Oʻtgan kunlar

2. koʻchma Qiynamoq, azoblamoq, siqmoq; bezor qilmoq.

Yamoqchini boʻlsa Ismathoji har kuni masjidga chaqirib, odamlar oʻrtasida haqorat qila berib jonini oldi. Oydin, Yamoqchi koʻchdi

Joni bor

1. Tirik, jonli.

Joni borning umidi bor.
Tanimda jonim bor ekan,paxta berishga tirishaman. Sh. Rashidov, Gʻoliblar

2. koʻchma Asosi bor, asosli.

Gapingizning joni bor.

Joni uzilmoq

Vafot etmoq, oʻlmoq.

Joni chiqmoq

1. aynan Joni uzilmoq.

Joning chiqqur! (qargʻ.). Ter chiqqandan jon chiqmas. Maqol
Ibn Sinoga kasalning joni chiqmagan boʻlsa, bas ekan, tuzatar ekan. Oybek, Tanlangan asarlar

2. koʻchma Qoʻrqmoq, esi chiqib ketmoq.

Tuf-e, qurib ketsin, jonim chiqib ketdi-ya. A. Qodiriy, Oʻtgan kunlar

3. koʻchma Jahli chiqmoq, achchigʻi qistamoq, gʻazabi kelmoq, dargʻazab boʻlmoq.

Olarda kirar jonim, berarda chiqar jonim. Maqol
Polvon kelganda, temirchi shunday qilgan edi, uning joni chiqib, tishini gʻijirlatdi. A. Qahhor, Sarob

Joni halqumiga (yoki boʻgʻziga, hiqildogʻiga) kelmoq

1. Oʻlar holatga kelmoq, oʻlguday qiynalib ketmoq.

Dushmanlar joni halqumiga kelganda mana bunday quturadilar. A. Muxtor, Opa-singillar

2. koʻchma ayn. Joni chiqmoq 2.

Boya nimalarni soʻzladingiz, sir ochiladimi, deb jonim boʻgʻzimga keldi. A. Qodiriy, Oʻtgan kunlar

3. koʻchma Bezor boʻlmoq, toqati toq boʻlmoq.

Hamma yerda ham odamlarning joni boʻgʻziga kelib qoldi, qizim! M. Ismoiliy, Fargʻona tong otguncha

Jon(i) achimoq

Achinib, dildan xayrixohlik bildirmoq; achinmoq.

Unga jonim achidi.

Jondan oʻtmoq

1. Badanni, aʼzoni ogʻritmoq, qaqshatmoq, zirqiratmoq.

Ogʻriq jondan oʻtdi;

2. Qattiq taʼsir qilmoq, alam qilmoq.

Ayniqsa, bugungi soʻzlar jon-jonimdan oʻtib ketdi. Sh. Rashidov, Gʻoliblar
Eshonning dakkisi jonimdan oʻtgandan keyin qochdim. P. Tursun, Oʻqituvchi

Jonini koyitmoq

Qiynalib, mashaqqat chekib, biror ish qilmoq, qattiq urinmoq.

Qoʻshchinorliklar yoki qoʻgʻazorliklar u yoqda tursin, suvning boshida boʻladigan baqaqurulloqliklar ham oʻzi yoki ulovining jonini koyitgisi kelmas edi. A. Qahhor, Qoʻshchinor chiroqlari

Jon saqlamoq

Oʻzini maʼnaviy yoki jismoniy halokatdan yoki ogʻir, mushkul ahvoldan saqlab qolmoq.

Oftobdan daraxtlarning tagida jon saqlamoq.
U hamon kovakda jon saqlab kelmoqda. Befarosat, laqma odamni koʻrsa, kovakdan sekin chiqadi, allakimdan eshitgan yangiliklarni aytadi, yana kirib ketadi. A. Qahhor, Hi-hi

Jon hovuchlamoq

Oʻz hayotidan xavotir boʻlmoq, qoʻrqa-pisa, xavotirda yashamoq.

Mirzo Yodgorning boshi kesildi. Uning tarafdorlari jonlarini hovuchlab, in-iniga kirdi. Oybek, Navoiy

Jon(i)ga ora kirmoq

1. Halokatdan yoki biror koʻngilsiz voqeadan, tang holatdan saqlab qolmoq.

Bular jonlarini fido qilib, minglarcha kishilarning joniga ora kirdilar. A. Qahhor, Oltin yulduz

2. Qiyin, mushkul ahvoldan qutqazmoq, ogʻir paytda yordamga kelmoq, yordam qilmoq.

Shunday doʻppi tor kelgan paytda Azim boyvachcha Xol-xoʻjaning joniga ora kirdi. S. Ahmad, Hukm

Jondan bezor qilmoq (yoki toʻydirmoq)

1. Oʻlimiga rozi qilmoq;

2. Juda ham zeriktirmoq, koʻngliga urmoq, bezor qilmoq.

[Oqila:] Oʻzingiz qachon borasiz? Bolalar dada deb jonimdan bezor qilishyapti. A. Qahhor, Ogʻriq tishlar

Jondan bezor boʻlmoq (yoki toʻymoq)

1. Oʻlimiga rozi boʻlmoq, yashashni istamaslik.

Qullar ochlikdan oʻlsin, qarollar charchab, jonidan bezor boʻlsin, har nima boʻlsa-boʻlsin, senga foyda boʻlsin. S. Ayniy, Qullar
Ovozingni chiqarma, juvonmarg. Eshon pochchang eshitmasinlar. Nima, joningdan toʻydingmi? P. Tursun, Oʻqituvchi

2. Ortiq toqat qila olmaslik; bezor boʻlmoq.

Bas, pichoq borib suyakka yetdi. Boshimni egib, indamay yurganim yetar, jonimdan toʻyib ketdim. Sh. Rashidov, Boʻrondan kuchli

Jonini tikmoq

Hayotini bagʻishlamoq.

Men jonimni yaxshilik yoʻliga tikkanman, Zokirjon. P. Qodirov, Uch ildiz

Joni yoʻq

1. Ulik, jonsiz.

Soyga qarasak, uchta baliq yotibdi: ikkitasi oʻlik, bittasining joni yoʻq. Ertaklar

2. Koʻchma kuchi yoʻq, kuchsiz, madorsiz.

Bir qoʻlimning joni yoʻqroq. Sening mushtingni yeya berib, jonimda jon qolgan emas. A. Qahhor, Qoʻshchinor chiroqlari

3. Boʻsh, chidamsiz.

Joni yoʻq ip. Joni yoʻq mato.

Jon olib, jon bermoq

Biror ishda astoydil gʻayrat koʻrsatmoq; jonbozlik, fidokorlik qilmoq.

Boʻtaboy kechani kecha, kunduzni kunduz demay, kolxoz uchun jon olib, jon berdi. S. Ahmad, Hukm

Bir jon, bir tan boʻlmoq

Bir yoqadan bosh chiqarmoq, bahamjihat boʻlmoq.

Jon achchigʻida (yoki holatda)

1. Oʻlim talvasasida.

Ofitserning oʻzi ham talvasada holdan toygan edi, buning ustiga xotini polda yumalab, jon achchigʻida xirillardi. A. Muxtor, Qoraqalpoq qissasi

2. Gʻayriixtiyoriy ravishda, beixtiyor.

Chekkasini zax yerga berib yiqilgan va kesak kabi hissiz qizini [qutidor] jon holatda quchogʻiga oldi: Qizim Kumush Koʻzingni och! A. Qodiriy, Oʻtgan kunlar

Jon deb

Xursandlik bilan, mamnuniyat bilan, bajonidil.

Agar lozim kelsa, toshkoʻmir koniga borib, koʻmir qazib keltirishga ham jon-jon deb ketar edim. A. Qahhor, Sarob

Jon koshki

Koshkiydi, qani edi-ya.

Jon kuydirmoq

1. Bor kuch-imkonini ayamay astoydil harakat qilmoq.

Butun jamoa bayramni munosib kutib olish uchun jon kuydirib ishlamoqda;

2. Achinmoq, qaygʻurmoq, iltifot koʻrsatmoq.

Besh bolali bir ayolning Elmurodga jon kuydirib, uni oʻz panohiga olmoqchi boʻlgani toʻgʻrisidagi gaplar Buvinisoga juda xush keldi. P. Tursun, Oʻqituvchi

Jon talvasasi

Joni kirmoq

1. Huzur qilmoq, maza qilmoq, orom olmoq.

Uyiga suv, gaz oʻtkazib, joni kirdi. Tish oldirib, joni kirdi;

2. Juda xursand boʻlmoq, quvonmoq, sevinchi ichiga sigʻmay ketmoq.

Kino desa, joni kiradi.
Ayollar: — Boʻlmasa-chi! Hammaning joni kirdi. Qamishkapada hech bunaqa tomosha boʻlgan emas, — deyishdi. P. Tursun, Oʻqituvchi

Jon(i)ga tegmoq

Bezor qilmoq, koʻngliga urmoq, koʻngliga tegmoq.

Musofirchilik jonga tegadi. Oybek, Tanlangan asarlar
Bir ish buyursang, soʻray berib jonga tegadi. Oydin, Uyaldi shekilli, yerga qaradi.

Jonim bilan

Bosh ustiga, jon deb, bajon dil.

Agar shaharda zarur ishlaringiz boʻlmasa, men bilan bir yerga borib kelsangiz. —Jonim bilan. M. Ismoiliy, Fargʻona tong otguncha
Askarlikka jonim bilan boraman P. Tursun, Oʻqituvchi

Jonim tasadduq

Joʻjabirday jon

Oʻlmagan mening jonim

JON so‘zining sinonimlarini Sinonim.uz saytida qidirib ko‘ring.

ЖОН so‘zining kirillcha yozilishi Lotin.uz sayti tomonidan taqdim qilingan.

Izohli lugʻat Savodxon loyihasi bilan hamkorlikda yaratildi. Savodxon dasturi matndagi imlo xatolarini aniqlash va tuzatishga imkon beradi.

Batafsil

Saytdagi o‘rni

928

So‘zning teskari yozilishi

noj

Harflar soni

Ko‘rishlar soni

4698

jon so‘zi ishlatilgan saytlarni internetda qidiring

Google Яндекс Bing

Siz uchun qiziq bo‘lishi mumkin bo‘lgan so‘zlar

abbat achinarli achchiq abadulabad Nizomiy abyot Xorazmiy abadiyat acha

jon so‘zining ma’nosi va izohi bilan batafsil tanishib chiqamiz. O‘ylaymizki, endi siz Izoh.uz saytidan foydalanib, jon so‘zini lotin va kirill alifbosida to‘g‘ri va o‘z o‘rnida ishlata olasiz.

Alifbo bo‘yicha

A B D E F G H I J K L M N O P Q R S T U V X Y Z O‘ G‘ Sh Ch

Izohli lugʻat Savodxon loyihasi bilan hamkorlikda yaratildi. Savodxon dasturi matndagi imlo xatolarini aniqlash va tuzatishga imkon beradi.

Batafsil

Tasodifiy so‘zlar

Hammasini ko‘rish

Yangi so'zlar