O‘zbek tilining
izohli lug‘ati
ЎЗ
Izoh.uz saytida bosh so‘zining izohi va ma’nolari

bosh

ot

1. Tananing boʻyindan yuqorigi, oldingi (odamda, hayvonlarda) qismi; kalla.

  1. Bosh kosasi (anatomiya). Bosh miya. Bosh kiyimlar magazini. Doʻst boshga boqar, Dushman — oyoqqa. Maqol

  2. Oʻzbek oyim boshi bilan keliniga rizolik bildirib, barakalla! deb qoʻydi. A. Qodiriy, Oʻtgan kunlar

  3. — Badanim oʻt boʻlib yondi, boshim ogʻrib, koʻzlarim tindi, — dedi Hoji xola. M. Ismoiliy, Fargʻona tong otguncha

  4. U shoshib, ot boshini chap tarafga burdi. S. Ahmad, Ufq

2. koʻchma Aql-hush, miya.

  1. Bosh bilan ish qilmoq. Togʻning koʻrki tosh bilan, odamning koʻrki bosh bilan. Maqol

  2. Agronomga oʻz boshi bilan ish qilishga ruxsat berish kerak. S. Nurov, Narvoy

  3. Qoratoy Yoʻlchining yelkasini doʻstona qoqib dedi: — Rosa boshing bor, inim Yoʻlchi, oltin boshing bor. Gaplaring — bari haq. Oybek, Tanlangan asarlar

3. Boshliq, rahbar.

  1. Yaxshi yigit — davraning boshi. Maqol

  2. Yaxshi xotin erni elga bosh qilur, Yomon xotin erini gado qilur. Maqol

  3. Yomonga bosh boʻlguncha, yaxshiga yoʻldosh boʻl! Maqol

  4. Qirq yigitga bosh boʻladigan xotin edi. A. Qahhor, Qoʻshchinor chiroqlari

  5. Singlingning toʻyiga sen bosh boʻlasan, sening toʻyingga Robiya bosh boʻladi. Oʻ. Hoshimov, Ikki eshik orasi

4. sft. Lavozim, mansab jihatdan katta, yuqori turuvchi.

  1. Bosh vrach. Bosh agronom.

  2. Rustam Surxondaryo viloyatidagi kolxozda bosh agronom boʻlib ishlayotibdi. Mushtum

  3. Direktorning bu gapi bosh injenerga qaymoqday yoqib ketdi. Mushtum

  4. Uning otasi bosh choʻpon, oʻzi esa choʻpon yordamchisi boʻlib ishlay boshladi. Gazetadan

  5. Bundan soʻng ham bosh mirzoligingizni emas, mirza Anvarligingizni ehtirom qilamiz. A. Qodiriy, Mehrobdan chayon

5. Ulkan, katta, asosiy.

  1. Ozgina yurgach, Bogʻizogʻonning bosh arki oldidan chiqdilar. Oybek, Navoiy

  2. Mana Xorazmning janubiy bosh darvozasi. I. Jabborov, Koʻhna xarobalar siri

  3. Bosh sovrin taʼsis etildi Gazetadan

6. sft. Eng muhim, asosiy, yetakchi.

  1. Bosh masala. Bosh sabab. Paxta — bosh vazifa.

  2. Keyinchalik maktab sahnasida oʻynaladigan spektakllarda hamisha bosh rollarni ijro etadigan boʻldi. S. Karomatov, Hijron

  3. — Huzuringizga kelishimning bosh sababi shundadir! — dedi Hasanali. A. Qodiriy, Oʻtgan kunlar

7. sft. Eng oldingi, birinchi.

  1. Bosh bola. Bosh kelin.

  2. Qutidor boʻlsa, koʻz ochib koʻrgan qudamiz, xotining boʻlsa, bosh kelinimiz. A. Qodiriy, Oʻtgan kunlar

  3. Yoshi ulgʻayganda uylanganidan, bosh bolasi men edim. Oybek, Tanlangan asarlar

8. koʻchma s.t. Odam, kishi.

  1. Bir boshga bir oʻlim. Maqol

  2. Bir boshga yuzta xoʻjayin bor. S. Nurov, Narvoy

  3. Bu bosh dunyoga kelib nimalarni koʻrmadi-a! A. Qodiriy, Oʻtgan kunlar

9. (sanoq sonlar bilan) Chorva hisobida har bir adad jonivor.

  1. Oʻn bosh ot. Ikki bosh qoʻy. Har bosh sigirdan ikki yarim ming litrdan sut sogʻib olindi.

  2. Kolxoz chorvasiga bir yuz oʻn toʻqqiz bosh mol qoʻshildi. A. Qahhor, Qoʻshchinor chiroqlari

10. Tik narsalarning tepa qismi, uchi, choʻqqisi.

  1. Shamol boʻlmasa, daraxtning boshi qimirlamaydi. Maqol

  2. Toqatliga togʻlar egar boshini, toqatsizning birovlar yer oshini. Maqol

  3. Quyosh tik koʻtarilib issiqdan maysalarning boshi egildi. Shuhrat, Shinelli yillar

  4. Gul ochilgay qonlarning boshida, Lolalar bor buloqlarning toshida. H. Olimjon

11. Biror marosim, tadbir, voqea-hodisaning roʻy berish, amalga oshish jarayonidagi dastlabki bosqich.

  1. Yusufbek hojining oʻzi ish boshida turib, Oybodoqqa tashqari hovlini tozalatardi. A. Qodiriy, Oʻtgan kunlar

  2. Yuring, xolajon, qizni oʻzim topa-man, toʻyning boshida oʻzim boʻlaman, yor-yorni ham oʻzim aytaman O. Yoqubov, Pyesalar

  3. Bildimki, bu igʻvolarning boshida oʻzi bosh-qosh. K. Yashin, Hamza

12. Yon, old, tomon.

  1. Saidmurod aka xashakchilar boshiga borganda, ular tushlikka chiqishgan ekan. N. Qobul, Bemorlar

  2. Tez-tez boshimga borib tur. S. Ahmad, Yulduz

13. Oʻrin, karavot va shu kabilarning bosh qoʻyiladigan yuqori tomoni; shunday oʻrinda yotgan kishining beldan yuqori tomonidagi joy.

  1. soʻri ustiga yozilgan oʻrinning bosh tomonidagi uchi tepaga choʻnqaytirib qoʻyilgan yostiqlar ozoda hayotdan xabar berardi. Shuhrat, Shinelli yillar

  2. oʻrnidan dik etib turib, karavot boshiga tashlab qoʻyilgan shimning kamarini sugʻurib oldi. M. M. Doʻst, Lolazor

  3. Asqar ota borib, sagʻananing bosh tomoniga choʻkka tushdi va baland ovoz bilan quron oʻqidi. A. Qahhor, Asarlar

  4. Hoji Kumushning boshiga kelib oʻtirdi. A. Qodiriy, Oʻtgan kunlar

  5. — Bir vaqt hushimga kelsam, otam boshimda yigʻlab oʻtiribdi, — dedi Hoji xola. M. Ismoiliy, Fargʻona tong otguncha

14. Baʼzi otlar bilan birikib, shu ot orqali ifodalangan narsaning oʻzini yoki u oʻrnashgan joyni, yon-atrofini bildiradi.

  1. Nigor oyim oʻchoq boshida ovqat pishirish bilan mashgʻul edi. A. Qodiriy, Mehrobdan chayon

  2. Mullanavroʻz xirmon boshida qoldi. S. Ayniy, Qullar

  3. Otam mashʼalani tutib, oxur boshiga bordilar. Sh. Xolmirzayev, Ogʻir tosh koʻchsa

  4. Haydar ota shu bahona bilan u yoq-bu yoqni ham koʻray deb, aylanishroq boʻlsa ham, bozor boshidan yurdi. A. Qahhor, Asarlar

15. Choʻziq, davomli, boʻyli narsalar, joy, maydonlarning boshlanish joyi yoki oxiri, etagi; shunday narsalarning ikki uchidan, chekkasidan, tomonidan biri.

  1. Daryo boshlangan joy daryo boshi deyiladi. Geografiya

  2. Yormat Yoʻlchini sudrab, koʻchaning boshiga, aravalar toʻxtagan joyga yugurdi. Oybek, Tanlangan asarlar

  3. Xiyobonning bu boshida naqshdor, havorang baland ayvonning bir chekkasi koʻrinib turardi. A. Qahhor, Asarlar

  4. Avaz dala boshida, omonat bir chayla soyasida soch olib turardi. S. Siyoyev, Avaz

  5. Xonaning u boshidan bu boshiga yurdi. Shuhrat, Shinelli yillar

16. Voqea, hodisaning, biror muddat yoki faslning, asar, matn va shu kabilarning boshlanish joyi, payti, avvali, muqaddimasi.

  1. Hikoyaning boshi. Yilning boshi. Ishimning boshi yoʻq, Oshimning moshi yoʻq. Maqol

  2. Toʻyning boshi — boshlanguncha. Maqol

  3. Qiz soʻzning boshini eshitib iljaydi, oxirini eshitib, qoʻrquvdan boʻzardi. P. Tursun, Oʻqituvchi

  4. Mamlakat urushning boshidayoq otadan ayrilib, ona qoʻlida qoldi. Oʻ. Umarbekov, Sirli sohil

  5. Toʻti bu xatning boshini eshitiboq, oʻzini yerga koʻtarib urgan edi. S. Zunnunova, Olov

  6. — Men, boʻlmasa, gapni boshidan boshlay, — dedi Abdurasul. P. Tursun, Oʻqituvchi

  7. Sentyabr boshlarida polk gʻarbga tomon yoʻl oldi. Oybek, Tanlangan asarlar

  8. Homidning sovchisi boshqa sovchilarning muqaddimasi, yoz boshida keladigan qaldirgʻochlarning yoʻlboshchisi edi. A. Qodiriy, Oʻtgan kunlar

17. Voqea, hodisa va shu kabilarning boshlanishi uchun bahona boʻlgan narsa, dastlabki sabab.

  1. Qoʻshnimning oshi — janjalning boshi. Maqol

  2. Qumriniso Sobiraxonga koʻz qisib: — Oʻyin-kulgimizning boshi Bahrixonning toʻyi boʻladi, — dedi. A. Qahhor, Xotinlar

  3. Baxtni birovlarning ostonasidan qidirishning oʻzi baxtsizlikning boshi! A. Qahhor, Ogʻriq tishlar

18. Baʼzi oʻsimliklarning kalla yoki chochoq shaklidagi hosili, mevasi.

  1. Bir bosh uzum. Bir bosh karam. Topgan gul keltirar, topmagan — bir bosh piyoz. Maqol

  2. Pesh-taxta oldiga borib, savatdagi uzumdan bir bosh tanladi-da, tarozi pallasiga qoʻydi. K. Yashin, Hamza

  3. Qayoqdan ham bir bosh koʻknor topib ichirdik, ogʻziga jiydaning suvini tomizib koʻrdik. S. Siyoyev, Yorugʻlik

19. (sanoq sonlar bilan) Karra, hisob.

  1. Besh bosh qilib olmoq. Oʻn bosh qilib toʻlamoq.

20. 3-shaxs egalik va joʻnalish kelishik, oʻrin-payt kelishik, chiqish kelishik affikslari bilan koʻmakchi vazifasida qoʻllanadi (boshiga, boshida, boshidan).

bosh soʻzi qatnashgan jumlalar:

Boshga tushgan (yoki kelgan)

Hayotda uchragan, duch kelgan; peshonasiga yozilgan.

  1. Boshga tushganni koʻz koʻrar. Maqol

  2. Oʻzbek oyim ham boshiga tushgan bu kulfatni koʻrishga majbur edi. A. Qodiriy, Oʻtgan kunlar

  3. Uf Muhabbat nima ekanini boshingga tushganda bilasan! A. Qahhor, Asarlar

  4. Boshimizga tushgan neki kulfat boʻlsa, falokat, badbaxtlik, zulm, xorlik boʻlsa, bari shundan — nafsimizdan. S. Siyoyev, Yorugʻlik

Boshda bor

Taqdirda, qismatda bor; peshonaga yozilgan.

  1. Gulsumbibining yoniga Xonimbibi qoʻshilishdi: — Koʻp oʻylashmang, oʻrtoqlar! Bari bir, bu gap hammamizning boshimizda bor. A. Qodiriy, Oʻtgan kunlar

  2. — Taqdiri aza/i, oʻgʻlim, xafa boʻlma, hammaning boshida bor gap, — deb yupatdi. S. Karomatov, Oltin qum

Boshdan kechir(il)gan (yoki oʻtgan)

Hayotda, taqdirda koʻrilgan, yuz bergan, kechir(il)gan.

  1. Tabib tabib emas, boshidan oʻtgan — tabib. Matal

  2. Sayid Jalolxon butun boshdan kechirganlarini inqillay-inqillay hikoya qilib berdi. A. Qahhor, Koʻr koʻzning ochilishi

  3. Bekmurodov boshidan oʻtgan voqealarni oʻzi aytib bergan edi. S. Ahmad, Yulduz

  4. Kishi hayot yoʻlida boshdan kechirgan voqealar orasida baxtli deb oʻylagan zamonlarini yodlashdan har choq zavqlanadi. Oybek, Tanlangan asarlar

Boshiga yogʻilgan

ayn. Boshga tushgan.

  1. Nogahoniy boshiga yogʻilgan falokatni oʻzing daf qilgin. X. Toʻxtaboyev, Shirin qovunlar mamlakati

Boshiga solmoq

Ogʻir qiyinchilikka, azobga duchor qilmoq.

  1. Jonim, man muncha baxti qora yaratilgan ekanmanki, xudo shoʻrlik boshimga shuncha kulfatlarni soldi. Oybek, Tanlangan asarlar

  2. bundan keyin koʻrgan azobimni xudo hech bandaning boshiga solmasin. Oybek, Tanlangan asarlar

Boshim kal, koʻnglim nozik

Bosh ogʻritmoq (yoki qotirmoq)

1. Qattiq oʻylamoq, fikr yuritmoq; tashvish qilmoq.

  1. Hayotni mukammal qilaman, deb sizdan oldin ham ne-ne odamlar bosh qotirgan. S. Siyoyev, Yorugʻlik

  2. Hosil Yoqubov nozikroq bir narsa ustida bosh qotirib oʻtirgan ekan Mushtum

  3. Har narsaga aqlingiz yetadi Loaqal bu baxtsiz singlingiz uchun birgina bosh ogʻritsangiz-chi. A. Qodiriy, Oʻtgan kunlar

2. Miyani achitmoq, garang qilmoq.

  1. Agar boshni ogʻritmoqchi boʻlsangiz — katta koʻcha; toʻrt tomoningiz qibla. H. Gʻulom, Mashʼal

  2. Nima uchun boshimni ogʻritganingizga tushuna olmadim, oʻrtoq rais. Sh. Rashidov, Boʻrondan kuchli

  3. Soʻz bilan dehqonning boshini qotirib, nihoyat, toʻrt yarim soʻmga koʻnishga majbur qildi. Oybek, Tanlangan asarlar

Boshiga kelmoq

Miyasiga, esiga kelmoq.

  1. Shu savol boshiga kelganda, koʻziga toʻsatdan Kanizak koʻrinib, Sidiqjonning yuragi oʻynab ketdi. A. Qahhor, Qoʻshchinor chiroqlari

Bosh harf

tlsh. Katta harf.

  1. Yozuvda har bir gap bosh harf bilan boshlanadi. Oʻzbek tili darsligi

  2. Kimning nomiga xat yoki boshqa narsa kelsa, pochtalon adresat nomining bosh harfida yozilgan yashikka qoʻyib, yuboriladigan xat boʻlsa, olib ketar edi. A. Qahhor, Qoʻshchinor chiroqlari

Bosh gap

tlsh. Mustaqil, asosiy gap.

  1. Oʻzicha mustaqil, boshqa gapga ergashmagan gap bosh gap deb ataladi. Oʻzbek tili darsligi

Bosh maqola

Gazeta va jurnallarda tahririyat tomonidan beriladigan, dolzarb masalaga bagʻishlangan maqola.

  1. Bosh maqolada ilgʻor kolxozchilarning ish tajribalari umumlashtirilgan edi. A. Qahhor, Qoʻshchinor chiroqlari

Bosh toʻgʻon

Gidrotexnik inshootning eng yuqori tomonidagi asosiy toʻgʻon.

  1. 1940 yilning may oyida bosh toʻgʻon bitdi. Oʻzbekiston qoʻriqlari

Bosh barmoq

ayn. Boshmaldoq.

  1. Sal narida qayerdandir Shukrulloni bosh barmogʻi bilan imlab chaqirardi. Yoshlik

  2. Eshagini tepganda, chap oyogʻining bosh barmogʻi chiqib ketgan ekan. O. Yoqubov, Er boshiga ish tushsa

Bosh xotin

1. Eng oldingi xotin;
2. etn. Eng katta xotin.

  1. Najmiddinboyning bosh xotinidan Abdullaboy, kichik xotinidan Fazliddin tugʻilgan. Oybek, Tanlangan asarlar

  2. Qilich xalifaning bosh xotini Qumribibi juda tashvishga tushgan edi. S. Ayniy, Qullar

  3. Ul kishiga kuyovga chiqsang, sen bosh xotin, barcha xotinlari sening choʻring boʻladilar. M. Osim, Karvon yoʻllarida

Jon boshiga

Har bir odamga, har qaysi kishiga.

  1. Bizning ferma mudirimiz jon boshiga sut isteʼmol qilishda Amerikadan allaqachon oʻtib ketgan. Mushtum

Soʻqqa bosh (toʻgʻrisi soʻqqabosh)

Yakka oʻzi, bir oʻzi.

  1. Hidoyat qori, soʻqqabosh boʻlgani sababli onasini ishga chiqarardi. Mirmuhsin, Mixlar va poʻpanaklar

Boshi berk koʻcha

1. Bir tomondan kirib, ikkinchi tomondan chiqib ketib boʻlmaydigan koʻcha.

  1. Izvosh boshi berk koʻchada toʻxtadi. Oybek, Tanlangan asarlar

  2. Bu boshi berk koʻchada u uzoq qamalib qolmaydi. A. Qodiriy, Oʻtgan kunlar

2. koʻchma Mushkul, qiyin ahvol, chorasizlik, ilojsizlik.

  1. Otabek boshi berk koʻchada qolgandek boʻldi, javobiga qiynaldi. A. Qodiriy, Oʻtgan kunlar

  2. Axir hali biz boshi berk koʻchaga kirib qolganimiz yoʻq-ku. Ular bilan olishib koʻramiz. S. Ahmad, Ufq

Boshi-keti yoʻq (yoki koʻrinmaslik)

Boshla-nishi va oxiri nomaʼlum, cheksiz, tugamas.

  1. Transheya qirgʻogʻi boʻylab yaltiroq yoʻgʻon quvur choʻzilib ketgan, boshi-keti koʻrinmaydi. H. Nazir, Oʻtlar tutashganda

  2. boshi-keti yoʻq mehnat davom etmoqda. P. Tursun, Oʻqituvchi

Avval boshi

Avvalo, dastavval.

  1. Bu gapni avval boshda oʻzi kovlab qoʻyganligi uchun jim turishga majbur edi. K. Yashin, Hamza

  2. Bu savolga avval boshi Boʻtaboy akam javob berishlari kerak: A. Qahhor, Qoʻshchinor chiroqlari

  3. Avval boshi oʻzimizning kolxozchilarga tushuntirish kerak. A. Qahhor, Qoʻshchinor chiroqlari

Bir boshdan

1. Boshidan, boshlanish joyidan, tartibi bilan, bafurja.

  1. Men hadeb savol beraverganimdan keyin injener hamma voqeani bir boshdan gapirib berdi. H. Nazir, Choʻl havosi

  2. U oʻz boshidan kechirgan kulfatlar qanchalik ogʻir boʻlsa ham, bu jonajon doʻstlariga bir boshdan soʻzlab berishga tayyor edi. P. Tursun, Oʻqituvchi

2. Bir chekkadan, tartibi bilan.

  1. Provodnik koʻzoynagini burun chetiga tushirib olib, bir boshdan biletlarni tekshirishga kirishdi. Z. Fatxullin

  2. Oyimxon unga [Gulsumga]: — Mayli, qiynalib oʻtirma, senga bir boshdan hamma harflarni oʻrgatib qoʻya qolay, — debdi. P. Tursun, Oʻqituvchi

Xat (yoki satr) boshi

ayn. Abzas.

  1. Xat boshidan takror oʻqimoq. Qayta boshdan Qaytadan, yangidan

Ayol (yoki xotin) boshi bilan

Xotin kishi boʻlgani holda, ayol, ojiza boʻla turib.

  1. Endi xotin boshi bilan Margʻilonga murojaat qilsinmi? A. Qodiriy, Oʻtgan kunlar

  2. Ayol boshi bilan mistovoqdek ketmonda ishlaganda, biz yuramizmi kaftdek ketmon tutib. T. Ashurov, Oq ot

Beva (yolgʻiz) boshi bilan

Ersiz (xotinsiz) holatda qiynalib, yolgʻizlik bilan, yolgʻiz oʻzi.

  1. Nainki bitta shu qizi deb umrini oʻtkazsa, koʻzimning oq-u qorasi deb avaylasa, beva boshi bilan shunchalik oʻstirsa-yu, u yuziga tik qarasa? Oʻ. Hoshimov, Qalbingga quloq sol

  2. Seni sevmasam, yarim kechada, qorongʻi koʻchada yolgʻiz boshim bilan orqangdan yugurib yurarmidim?! S. Ayniy, Qullar

Bir yostiqqa bosh qoʻymoq

  1. Zaynab ham umid bilan bir yostiqqa bosh qoʻygan. A. Qodiriy, Oʻtgan kunlar

Bir yoqadan bosh chiqarmoq

Bir jon, bir tan boʻlib, hamjihatlik, yakdillik bilan.

  1. Koʻpchilik bir yoqadan bosh chiqarib harakat qilsa, uning kuchi okean toʻlqinidan ham zoʻr boʻladi. S. Mahkamov, Shogird

  2. Endigi gap oʻzlaringda qoldi. Bir yoqadan bosh chiqa-ringlar. S. Ahmad, Ufq

Biror ishning boshini ushlamoq (yoki tutmoq)

Biror ishni, hunarni puxta egallab. shu ishda muqim boʻlmoq yoki umuman ishlamoq; bekor yurmaslik.

  1. Bundoq dalalarga chiqib, biror foydaliroq ishning boshini tutsangiz boʻlmaydimi? S. Nurov, Karvon

  2. Vaqti-soati kelsa, oʻqib olarman undan koʻra bir ishning boshini tutay. M. Hazratqulov, Jurʼat

Bosh burmoq

Vaʼdasidan chiqmaslik, boʻysunmaslik.

  1. Men shu qilgan yaxshiligingga sendan ruxsatsiz bosh bursam, oʻttiz pora kalomullo ursin! Hamza, Tanlangan asarlar

Boshga bitgan balo

  1. Oʻrtogʻingiz boshimga bitgan bir balo boʻldi. A. Qahhor, Asarlar

Boshga qoʻymoq

ayn. Boshiga koʻtarmoq 1.

Boshga qoʻndirmoq

Kiymoq.

  1. Kurtkani yelkamga tashladim, doʻngalak gruzincha shapkani boshga qoʻndirdim. S. Siyoyev, Yorugʻlik

Boshi bilan

1. Butun vujudi bilan, astoydil.

  1. Olimjon koʻpdan kutilgan ishga boshi bilan koʻmilib ketgan edi. Sh. Rashidov, Boʻrondan kuchli

2. Joni, hayoti bilan.

  1. agar bundan bir xiyonat chiqmasa, hammadan burun men bunga boshim bilan javob beraman. S. Ayniy, Qullar

3. Boshi yordamida, bosh harakati bilan.

  1. Qoratoy boshi bilan yoʻq dedi. Oybek, Tanlangan asarlar

  2. Oʻzbek oyim boshi bilan keliniga rizolik bildirib, barakalla! deb qoʻydi. A. Qodiriy, Oʻtgan kunlar

Boshi bogʻliq

Unashtirib qoʻyilgan.

  1. Achchiqlanma, bek yigit, oʻzi uyatchan qiz, yana boshi bogʻliq. Oybek, Navoiy

Boshi buzuq yoki buzuq bosh

Igʻvogar, teskarichi, buzuq fikrli.

  1. Mana senga, uyingga boshi buzuqlarni yigʻganing uchun! S. Siyoyev, Yorugʻlik

  2. Amir qoziga buyruq yuborib, boshi buzuq oyoqyalanglarni va eski qullarning avlodini tutib qama, degan. S. Ayniy, Qullar

Boshiga yetmoq

1. Oʻldirmoq, halok qilmoq, nobud qilmoq.

  1. Otangning boshiga yetgan oʻshalar. A. Koʻchimov, Halqa

  2. Oʻpkasida qolgan oskolka oʻn yilgacha azob berib, oxiri boshiga yetdi. H. Tursunqulov, Hayotim qissasi

2. Oxirigacha borib, yetib tugatmoq; tugatmoq.

  1. Hozirgacha oltmish tugunning boshiga yetdingiz. S. Siyoyev, Yorugʻlik

Boshiga koʻtarmoq

1. Juda izzat-hurmat qilmoq, hurmatini bajo keltirmoq.

  1. Sharaflarga burkab ota nomini, Boshiga koʻtardi onajonini. B. Boyqobilov, Sadoqat

  2. Qani endi boshqa otalardek boʻlsa, boshimga koʻtarmasmidim. S. Ahmad, Ufq

2. Hamma yoqni buzgudek shovqin solmoq, janjal qilmoq.

  1. tovoqning jinday joyi uchgan ekan. Qaynanam shuni koʻrib qoldi-yu, butun hovlini boshiga koʻtardi. Mushtum

  2. Shuncha erkakning orasida uyalmaysanmi hovlini boshingga koʻtarib baqirgani, sharmanda!!! K. Yashin, Hamza

3. Shodlikdan, xursandchilikdan baqirmoq, shovqin solmoq.

  1. Toʻyib-toʻyib shoʻxlik, beboshlik, jinnilik qilsang, vodiyni boshingga koʻtarib qahqaha ursang. F. Musajonov, Himmat

  2. Qizlar uyni boshlariga koʻtarib, yor-yor aytishayotgan paytda, Sano-barga yaqin kelib, uning kiftiga qoʻlini qoʻydi. K. Yashin, Hamza

Boshiga suv quymoq

1. Nooʻrin sarflamoq, tugatmoq, tamomlamoq.

  1. Hash-pash deguncha brigadaga berilgan 14 ming soʻmning boshiga suv quydi. Mushtum

  2. Sendan nima koʻryapman? Qaytanga topgan-tutganimning ham boshiga suv quyayapsan. E. Raimov, Ajab qishloq

2. Pachavasini, rasvosini chiqarmoq.

  1. — Manavi-ku, —buvim meni koʻrsatdilar, — oʻqishning ham boshiga suv quydi. E. Raimov, Ajab qishloq

Boshiga uradimi?

Unga nima keragi bor? Keragi yoʻq.

  1. Opoqijon, unday demang, boshingizga urasizmi oʻsha betayin qizlarning mol-u dunyosini? X. Toʻxtaboyev, Shirin qovunlar mamlakati

  2. He, izzatini bilmagan pastkashlar, ikki mingni boshimga uramanmi? Mushtum

Boshiga chiqib (yoki minib) olmoq

Birovga hukmron yoki xoʻjayin boʻlmoq, boʻysunmay qoʻymoq.

  1. Bunday yigitning esa u boshiga minib olishi turgan gap edi. Oʻ. Umarbekov, Yoz yomgʻiri

  2. Senlarda oʻzi insof degan narsa bormi? Pensionerman deb boshimizga chiqib olasanlar, shekilli. S. Ahmad, Yulduz

  3. Choʻri qiz boshimizga chiqib, bizlarni oyoq uchi bilan koʻrsatadi. Oybek, Tanlangan asarlar

Boshiga oʻtqazib qoʻymoq

Hammadan ustun qoʻymoq, rosa eʼzozlamoq.

  1. Yosh, chiroyli xotinga yoqish, uning koʻnglini koʻtarish uchun uni hammamizning boshimizga oʻtqazib qoʻydi. Oybek, Tanlangan asarlar

Boshida yongʻoq (yoki tosh) chaqmoq

Doimiy ravishda xoʻrlamoq, azoblamoq, jabrlamoq.

  1. Keyin Gulnorga xudo beradi, u erka-arzanda xotin boʻlib koʻngliga nima kelsa, shuni qiladi boshimizda yongʻoq chaqadi. Oybek, Tanlangan asarlar

  2. Uch kun oʻtmay [kundoshim] boshimda tosh chaqishga boshladi. Oybek, Tanlangan asarlar

Boshida kaltak (yoki tayoq) sinmoq

  1. mudirning tayogʻi koʻproq uning boshida sina boshladi. Guldasta

Boshidan zar quymoq

Boshida qolmoq

Kerakmas, zarurmas; qurib ketsin maʼnolarida ishlatiladi.

  1. Qarab turing, toʻyiga ham bormayman, toʻyi boshida qolsin. T. Alimov, Sovgʻa

  2. Topib kelgan matohing boshingda qolsin. S. Ahmad, Yulduz

Boshi yostiqqa tegmoq

1. Yotmoq, uxlamoq;
2. Kasallanmoq, betoblanmoq.

Boshi ketmoq

Oʻldirilmoq, qurbon boʻlmoq.

  1. toʻgʻri gapir, boʻlmasa boshing ketadi. U. Ismoilov, Saylanma

  2. Boshimiz ketsayam, qaytmaymiz bu yoʻldan. O. Yoqubov, Er boshiga ish tushsa

Boshi koʻkka (yoki osmonga) yetmoq

Gʻoyat xursand boʻlmoq, juda ham koʻngli koʻtarilmoq.

  1. Masalani shunday hal qilish kerak edi. Karimqul akadan eshitib, boshim koʻkka yetdi. Oybek, Oltin vodiydan

  2. shabadalar

  3. Toʻsatdan kirib borsam, onam bechoraning boshi koʻkka yetar Guldasta

Boshing toshdan boʻlsin

Umring uzoq boʻlsin, zavol koʻrma, oʻlma.

  1. Ha, ishqilib, boshi toshdan boʻlsin. A. Qahhor, Asarlar

  2. Xayr, oʻgʻlim, qayerda boʻlsang ham, omon boʻl, boshing toshdan boʻlsin. Guldasta

Boshini aylantirmoq

  1. Oilali boʻla turib, yosh qizning boshini aylantirishga uyalmadingizmi? Oʻ. Hoshimov, Qalbingga quloq sol

Boshini bogʻlamoq

Unashtirib yoki uylantirib qoʻymoq.

  1. Biz Otabekni Toshkentdan uylantirib, boshini bogʻlamasak, kun sayin uning Margʻilon yugurishidan qutula olmasmiz. A. Qodiriy, Oʻtgan kunlar

  2. — Ikkala tomonning keli-shuvidan soʻng fotiha qilinib, qizning boshi bogʻlandi. Mushtum

Boshini bukmoq

1. Uyaltirib, yerga qaratib qoʻymoq.

  1. Sekin gapir, sekin sharmanda qilding, boshimni yerga bukding, sen juvonmarg! Oybek, Tanlangan asarlar

  2. — Turing, qizim, — ellikboshining tovushi birdan muloyimlashadi, — ota-onaning boshini bukmang. Oybek, Tanlangan asarlar

2. Boʻysundirmoq, tiz choʻktirmoq, tobe qilmoq; tushkunlikka tushirmoq.

  1. Oʻyla, Qoratoy. Ishqilib, Yoʻlchi bolamga tayanch boʻl, yolgʻizlatma, yigitning koʻngli buzilmasin, boshi bukilmasin. Oybek, Tanlangan asarlar

  2. Qarz kishining boshini bukadi. Oybek, Tanlangan asarlar

Boshini yemoq

ayn. Boshiga yetmoq.

  1. Husning boshingni yeydi A. Muxtor, Qoraqalpoq qissasi

  2. Ota-onasining boshini yegan shum yetim. P. Tursun, Oʻqituvchi

Boshini ikkita qilmoq (yoki qoʻshmoq)

Uylantirib qoʻymoq.

  1. — Biz ham orzu-havas koʻrmay oʻtmasak: koʻzimizning ochiqligida boshingni ikkita qilib qoʻysak deymiz-da, oʻgʻlim, — dedi chol. M. Ismoiliy, Fargʻona tong otguncha

  2. Bir amallab qishdan chiqsak, Polvonboyning boshini ham qoʻshib qoʻyarmiz. J. Sharipov, Xorazm

Boshini silamoq

1. Erkalamoq, yupatmoq.

  1. Yoʻlchi Gulnorning boshini silab, voqeani qisqacha aytib berdi. Oybek, Tanlangan asarlar

  2. Nozim Zuhraning boshini asta silab, oʻz, koʻz yoshini belbogʻi uchiga artdi. Guldasta

2. Oʻz panohiga olib ardoqlamoq, boqmoq, tarbiya qilmoq.

  1. Elga bersang oshingni, erlar silar boshingni. Maqol

  2. Nodira onasi oʻrnida Anvarning boshini silab, istiqboli uchun qaygʻurdi. A. Qodiriy, Mehrobdan chayon

Boshini tikmoq

Oʻzini qurbon qilishga tayyor boʻlmoq.

  1. Nega endi mehnatkash musulmon uchun boshini tikkan yigitni jallod boltasiga topshirar ekan? K. Yashin, Hamza

  2. Ha, Homid aka, siz jonni ayamasangiz, men ham yoʻlingizga boshimni tikdim A. Qodiriy, Oʻtgan kunlar

Boshini xam qilmoq

Uyatga, nomusga qoldirib ketmoq, boshini (yuzini) yerga qaratmoq.

  1. El-yurt oldida boshimni xam qilib ketding, orqangdan quvmadim. S. Ahmad, Ufq

  2. Arzimagan ish deb boshini xam qilmang. S. Ahmad, Ufq

Boshini qovushtirmoq (yoki biriktirmoq)

Boshini qotirmoq (yoki ogʻritmoq)

1. Boʻlar-boʻlmas ish, harakat, gap va shu kabilar bilan joniga tegmoq, bezor qilmoq.

  1. Bemaʼni savollaring bilan boshimni qotirma;

2. Uzoq va jiddiy oʻylamoq; tashvish chekmoq.

  1. Bu azliy jumboq ustida ne-ne amomalar bosh qotirmadi deysiz. Fan va turmush

  2. Bukun ham xuddi shu maqsadda yigʻilishib, dekcha qaynatish gʻamida bosh ogʻritishardi. Oybek, Navoiy

Boshi ochiq (yoki boʻsh)

1. Paranji tashlagan, paranji yopinmaydigan; ochiq;
2. Unashtirilmagan, uylanmagan yoki ajralishgan.

  1. Endi u [Munavvar] boshi ochiq qiz bola emas. Oilali. S. Anorboyev, Mehr

  2. — Bugundan boshing ochiq. Uch taloq qoʻydim. Yoshlik

  3. Oʻzbeklarning yaxshi qizi bor boʻlsa, Boshi boʻshmi deyin, avval soʻrayin. Alpomish

Boshi chiqmaslik

(chiqish kelishigi bilan) Sira qutulmaslik, boʻshamaslik; doimo tashvish, gʻalva bilan yashamoq.

  1. Uning boshi kasaldan chiqmay qoldi.

  2. Ana shundan boshlab tashvishdan boshi chiqmay qoldi. J. Abdullaxonov, Xona-don

  3. hech yaxshilik qilmay deyman-u, koʻngil boʻshlik qilib qoʻyaman, keyin boshim gʻalvadan chiqmaydi. Oʻ. Umarbekov, Yoz yomgʻiri

Boshi qorongʻi

Baʼzi homilador ayollarda homiladorlikning dastlabki oylarida boʻladigan holat, ahvol (masalan biror narsani tusash yoki unga toqat qilolmaslik).

  1. Uning anorga boshi qorongʻi. Boshi qorongʻiga olam qorongʻi. Maqol

  2. Vika homilador, uning ittifoqo koka-kolaga boshi qorongʻi boʻlib qoldi. Mirmuhsin, Hikoyalar va qissalar

Boshi qotmoq (yoki shishmoq)

Nima qilarini bilmay qolmoq, gangib qolmoq; doimo oʻylab, biror xulosaga kelolmay yurmoq.

  1. Bu bitmaydigan savdodan Elchiyevning ham boshi qotib yurardi. E. Aʼzamov, Javob

  2. Yosh jurnalist topshiriqni olishga olib qoʻyib, boshi qotib qoldi. Mushtum

  3. Eshitdim, lekin nima chora? Shu kunda hammaning boshi shishgan. Oybek, Tanlangan asarlar

Bosh koʻtarib yurmoq

Yuzi yorugʻ, pok, halol boʻlganligi uchun kishilar oʻrtasida bemalol, xijolat boʻlmay, yerga qaramay yurmoq.

  1. Siz esingizni yeb qoʻyibsiz, oʻgʻlingizni margʻilonlikka topshirib qoʻyib, yana el ichida boshingizni koʻtarib yurmoqchi boʻlasizmi? A. Qodiriy, Oʻtgan kunlar

  2. Qizingizni deb shaharda bosh koʻtarib yurolmaydigan boʻldim. A. Qodiriy, Oʻtgan kunlar

Bosh koʻtarmoq

1. Oyoqqa turmoq, tuzalmoq.

  1. Bemor kasaldan bosh koʻtardi;

2. Mashgʻul boʻlgan biror ishdan toʻxtamoq, uzilmoq.

  1. Professor Sherzodning kasallik varaqasidan bosh koʻtardi-da, negadir jilmaydi. Oʻ. Hoshimov, Nur borki, soya bor

  2. — Yaxshi, — dedi Tursunboy ishidan bosh koʻtarmay. S. Ahmad, Ufq

3. Unib chiqmoq, koʻkarmoq.

  1. Koʻklam kelishi bilan begona oʻt bosh koʻtarmasin deb yer molalandi, chizellandi. H. Nuriy, Yashil xirmon

  2. Qishloq yomgʻirdan yuvilib, yashnab ketgan edi. Devorlar tagida adashib bosh koʻtargan munis maysalar ertaga qor ostida qolishidan bexabar yashnab turardi. Oʻ. Hoshimov, Qalbingga quloq sol

4. Ufqdan koʻtarilmoq, chiqmoq (asosan Quyosh, Oy haqida).

  1. Quyosh ufqdan asta bosh koʻtarib, oʻzining zarrin nurlarini socha boshladi. Yoshlik

  2. Qishloq qizlariday loʻppi yuzli oy Boshini koʻtardi, kuldi sahro, soy. Gʻayratiy

5. Qarshi harakat qilmoq, isyon qilmoq, qoʻzgʻalmoq.

  1. Toshkent hokimi boʻlgan Azizbek Qoʻqonga qarshi bosh koʻtargan. A. Qodiriy, Oʻtgan kunlar

  2. Kambagʻal bosh koʻtarsa, boy tosh koʻtaradi. A. Qahhor, Qoʻshchinor chiroqlari

  3. Bir vaqt kelib, dadamning kuni yetsa, Gulnorning churvaqalari bosh koʻtaradi. Oybek, Tanlangan asarlar

Bosh olib ketmoq

Hamma narsadan voz kechib, boshqa joylarga butunlay ketib qolmoq.

  1. Oʻz akamga men sigʻindi boʻlguncha, Bu oʻlkadan boshim olib ketayin. Alpomish

  2. Bugun u saroydan mutlaqo bosh olib ketdi. S. Siyoyev, Yorugʻlik

  3. Mehri kasalxonadan chiqqandan keyin, Niso buvi ikkala qizi bilan nomaʼlum tomonga bosh olib ketdi. A. Qahhor, Asarlar

Bosh oqqan tomonga ketmoq

Duch kelgan tomonga, toʻgʻri kelgan yoqqa qarab ketmoq.

  1. U koʻchaga chiqdi, qayoqqa borayotganini bilmay, boshi oqqan tomonga yurib ketdi. K. Yashin, Hamza

  2. Bechora ish qidirib, boshi oqqan tomonga borar ekan. Oybek, Nur qidirib

Bosh ogʻrigʻi

Dardisar narsa, ortiqcha tash-vish, daxmaza.

  1. Rostini aytsam, shu zamonda gap-soʻz qaynab ketgan, lekin birovining ham maʼnosi yoʻq, borida ham maza-matra yoʻq. Hammasi bosh ogʻrigʻi gaplar. Oybek, Tanlangan asarlar

  2. Boʻlsa boʻlar, boʻlmasa yoʻq-da. Bekorga bosh ogʻrigʻi qilib, ichingdan oʻrtanib yurasanmi? P. Tursun, Oʻqituvchi

Bosh suqmoq (yoki tiqmoq)

1. Oyoq quymoq, kirmoq, yetishmoq.

  1. Kampir enam qiz qidira-qidira tinkasi quridi, qaysi eshikka bosh tiqsa, soʻrasharmish: savdogarmi, bogʻi bormi, uy-joyi bormi? Oybek, Tanlangan asarlar

  2. Sen oʻlgur bu uyga bir marta ham boshingni tiqmading. Oybek, Tanlangan asarlar

  3. Xonaga Ergash bosh suqadi: — Mumkinmi? Guldasta

  4. Sherbek kechki payt ogʻilxonadan qaytib kelayotib, idoraga bosh suqdi. S. Anorboyev, Oqsoy

2. Oʻrnashmoq, joylashmoq.

  1. U aytgan tollar qulabdi, bosh tiqmoqchi boʻlgan maktab-maorif sohasiga tamoman yangi odamlar, olov nafasli yoshlar kelibdi. A. Qahhor, Qoʻshchinor chiroqlari

3. Aralashmoq, qotishmoq.

  1. Sobirjon birovlarning gapiga kirib, shunaqangi ishlarga bosh suqmasa edi. A. Muxtor, Opa-singillar

  2. Siz ham meni bolam desangiz, shu bugun mening ishimga bosh suqmang. O. Yoqubov, Pyesalar

4. Boshni tiqib, kiri-tib qaramoq, tekshirmoq.

  1. Ular eshik tirqishlaridan moʻralaydilar va qiya ochib, boshlarini suqadirlar. Oybek, Tanlangan asarlar

  2. Tohir pastki qavatdagi ochiq eshiklarga bosh tiqib qaradi. P. Qodirov, Yulduzli tunlar

5. Qoʻymoq, tiramoq.

  1. Gulnor boshini Yoʻlchining koʻkragiga suqib yigʻladi. Oybek, Tanlangan asarlar

Bosh tortmoq

1. Boshoqlamoq, gʻunchalamoq.

  1. Sizni ogʻzi qon boʻri dedim, chunki siz yangi ochilgan gullarni, endi bosh tortgan lolalarni vaqtsiz soʻldirasiz, ochilib bitmay oʻldirasiz. A. Qodiriy, Oʻtgan kunlar

2. Biror ish, vazifa, burch va shu kabilarni bajarishdan yuz oʻgirmoq, qochmoq.

  1. Armani usta qora marmar lavhadagi soʻzlarni oʻchirib, qayta yozishdan keskin bosh tortdi. N. Aminov, Suvarak

  2. Qoʻydek yuvosh musulmonlar bugun mardikorga borishdan bosh tortmoqdalar. N. Safarov, Tanlangan asarlar

Bosh toʻlgʻamoq

ayn. Bosh tortmoq 2.

  1. Bu taqdirda itoatdan bosh toʻlgʻagan Toshkent ustiga, albatta, Musulmonqul zolim qoʻshin tortar. A. Qodiriy, Oʻtgan kunlar

Bosh urmoq

1. Bormoq, murojaat qilmoq.

  1. Yoʻlchi qayoqqa bosh urishini, kimning yoqasidan tutishini bilmay, ancha vaqtgacha koʻchalarda tentirab yurdi. Oybek, Tanlangan asarlar

2. Yordam soʻramoq, bosh egib kelmoq.

  1. Sening uchun azizlarga bosh urdim, Borgin, bolam, seni haqqa topshirdim. Malikayi ayyor

  2. Axir farzand uchun ona nimalarga bosh urmaydi?. Guldasta

  3. Nega oʻylamay-netmay, eshigiga bosh urib kelgan bir yigitni quvlab soladir? A. Qodiriy, Oʻtgan kunlar

Bosh ustiga

Bajonidil, jon-u dil bilan.

  1. Uchrashganingiz toʻgʻrisida menga maʼlumot yozsangiz, tagʻin minnatdor qilardingiz. — Bosh ustiga. A. Qodiriy, Oʻtgan kunlar

  2. Tabibiyning gapi nojoʻya boʻlib, bir chalamulla bolaning soʻzlari eʼtiborga loyiq desangiz, minnatdormiz, bosh ustiga, xonim. S. Siyoyev, Yorugʻlik

Bosh egmoq

1. Boshini tushirmoq, yerga tomon pasaytirmoq.

  1. Qoʻshiq tamom boʻldi-yu, u boyagiday tabassum bilan ohista bosh egib qoʻydi. Oʻ. Hoshimov, Qalbingga quloq sol

  2. Ahmad Husayn boshini sal egdi, uning tusi ham allanechuk oʻzgardi. Oybek, Nur qidirib

2. Boʻysunmoq, itoat qilmoq, tiz choʻkmoq; sajda qilmoq.

  1. Qachongacha endi biz yotlarga bosh egamiz, pora berib kun koʻramiz. N. Safarov, Tanlangan asarlar

  2. Amirga boshini egmagan keksa shoirni otga bogʻlab, qurib yotgan oʻt ustida yoqib yuborishgan. Gazetadan

  3. Kimdir tosh otsa ham goho ortimdan, Qoshimda bosh egdi, kelib soʻnggi dam. A. Oripov, Yillar armoni

3. Yolvormoq, yalinmoq.

  1. Erkak boshimni egib qaytib boramanmi, unaqada xotinim boʻynimga chiqib oladi, derdi. S. Ahmad, Ufq

4. Motam tutmoq, motamsaro boʻlmoq.

  1. Mungli doʻppaygan qabrlar ustida bagri qon qizgʻaldoqlar bosh egdi. Oʻ. Hoshimov, Qalbingga quloq sol

  2. Bilki u kun boshim uzra Doʻstlar bosh ham egadir. A. Oripov, Yillar armoni

Bosh qashimoq

Noilojlikdan nima qilishini bilmay oʻylab qolmoq, xayol surmoq, bosh qotirmoq.

  1. Hovli oʻrtasida bosh qashib qoldi va koʻzini qisib, xotiniga qaradi. A. Qodiriy, Mehrobdan chayon

Bosh qoʻshmoq

Aralashmoq, qotishmoq; qoʻshilmoq.

  1. Boy, men oʻylagan bu ishga siz ham bosh qoʻshsangiz, savob boʻlarmidi? N. Safarov, Tanlangan asarlar

  2. Ukalarimning kir-chirini yuvib, bagʻriga olib oʻtirsin deb, bu ishga men oʻzim bosh qoʻshdim. Oybek, Tanlangan asarlar

  3. Meningcha, muhimi ishni boshlab olish, u yogʻiga xalqning oʻzi bosh qoʻshadi. K. Yashin, Hamza

Bosh harf

tlsh. Katta harf.

Ishi boshidan oshib yotibdi

  1. Nabirali boʻladigan Oʻzbek oyimning ishi boshidan oshgan edi. A. Qodiriy, Oʻtgan kunlar

Katta boshini kichik qilib

  1. Ammo-lekin xatosini tan olyapti, kechirim soʻrayapti katta boshini kichik qip. A. Koʻchimov, Halqa

Mening senga boshim qorongʻi edimi?

kest. Senga koʻzim uchib turganmidi? (nomatlub kishi kelib qolganda aytiladi).

Oyogʻiga bosh qoʻymoq

1. ayn. Bosh urmoq.

  1. Dushman qursin, eslarimni shoshirdi, Mirza Mahmud oyogʻiga bosh urdim. Yusuf va Ahmad

2. Bosh egib, hurmat, ehtirom bildirmoq.

  1. Agar koʻchada boʻlmasa edi, Yoʻlchi shu onda bu goʻzal, toza yurakli, jasur, vafodor qizning oyoqlariga bosh qoʻyishga tayyor edi. Oybek, Tanlangan asarlar

Erkak boshi bilan

Erkak kishi boʻla turib.

  1. Erkak boshi bilan koʻchada ogʻziga soʻrgʻich tiqib, bola koʻtarib yursinmi?! T. Alimov, Ishqilib oʻqimagan boʻlsin-da

  2. Erkak boshlari bilan ogʻizlari gʻiybatdan boʻshamaydi. S. Siyoyev, Otliq ayol

Oʻz boshiga

Har kim oʻz holicha, oʻzicha, mustaqil.

  1. — Bu oʻtirganlarning koʻpi yer olib, oʻz boshiga dehqon boʻlib oldi, — dedi Abdurasul. P. Tursun, Oʻqituvchi

BOSH so‘zining sinonimlarini Sinonim.uz saytida qidirib ko‘ring.

БОШ so‘zining kirillcha yozilishi Lotin.uz sayti tomonidan taqdim qilingan.

Izohli lugʻat Savodxon loyihasi bilan hamkorlikda yaratildi. Savodxon dasturi matndagi imlo xatolarini aniqlash va tuzatishga imkon beradi.
Saytdagi o‘rni
313
So‘zning teskari yozilishi
hsob
Harflar soni
4
Ko‘rishlar soni
988

bosh so‘zi ishlatilgan saytlarni internetda qidiring

Google Яндекс Bing

Siz uchun qiziq bo‘lishi mumkin bo‘lgan so‘zlar

Venera abadiyat abzalla abdol aʼlo Saturn Boburnoma aʼzam Neptun
bosh so‘zining ma’nosi va izohi bilan batafsil tanishib chiqamiz. O‘ylaymizki, endi siz Izoh.uz saytidan foydalanib, bosh so‘zini lotin va kirill alifbosida to‘g‘ri va o‘z o‘rnida ishlata olasiz.

Alifbo bo‘yicha

A B D E F G H I J K L M N O P Q R S T U V X Y Z O‘ G‘ Sh Ch

Tasodifiy so‘zlar

Hammasini ko‘rish

Yangi so'zlar

Hammasini ko‘rish

Izoh.uz loyihasi haqida

Izoh.uz — O‘zbek tilining xalqona izohli lug‘ati 35 000 dan ortiq so‘zlarning ma’nolari ibora va misollar bilan keltirilgan.

Yillar davomida “O‘zbek tili kuni”ga bag‘ishlab, o‘zbek tilini o‘rganuvchilar, jurnalistlar, tarjimonlar, kopirayterlar, blogerlar va boshqalar uchun foydali loyihalarni ishga tushirishni an’anaga aylantirganmiz. Bizning jamoa Lotin.uz, Imlo.uz, Sinonim.uz, Sarlavha.com loyihalarini hukmingizga havola qilgan.

Batafsil Izoh.uz loyihasi haqida

Loyihalarimiz

TVinfo.uz — Bugun, ertaga va keyingi hafta uchun to‘liq teledasturlar.

TVinfo.uz — Телепрограмма на сегодня, завтра и ближайшую неделю.

tvinfo.uz

O‘zbek Ismlarning to‘liq, batafsil ma’nosi, kelib chiqishi, shakllari. O‘zingiz va yaqinlaringizni ismlari ma’nosini bilib oling.

Полный смысл, происхождение, формы узбекских имён. Узнайте смысл своего имени и имён близких.

ismlar.com

DostavkaInfo — Taomlar, dorilar, kitoblar va boshqa uy uchun kerakli bo‘lagan narsalarni yetkazib berish xizmatlari bor servislar.

DostavkaInfo — Каталог сервисов, предлагающих доставку еды, лекарств, книг и товаров для дома.

dostavkainfo.uz

Lotin.uz — foydalanuvchilarga berilgan matnni lotindan kirillga va aksincha o‘girish xizmatini taklif etadi.

Lotin.uz — поможет транслитерировать с узбекской кириллицы на латиницу и обратно. Легко!

lotin.uz

Maqol va naqllarning eng katta kolleksiyasi. Har bir maqol uchta tilda (o‘zbek, rus, ingliz).

Самая большая коллекция пословиц и поговорок на трёх языках (узбекский, русский, английский).

maqollar.uz

Har kuni eng sara latifalar va kulguli rasmlar. O‘zbek tilidagi kulgu markazi!

Ежедневно только отборные анекдоты, смешные картинки. Кузница юмора на узбекском языке!

latifa.uz

Valyutani yuqori kursda almashtirish uchun yaqin punktlarni aniqlab beruvchi servis. Punkt joylashuvini kartada ko‘rsatadi.

Сервис, помогающий найти ближайшие пункты обмена валюты с выгодным курсом. Покажет местоположение пункта прямо на карте.

onmap.uz

O‘zbekcha telegram kanallarining eng katta katalogi. Faqt faol kanallar, ruknlarda va batafsil statistikasi bilan.

Самый большой каталог телеграм каналов в Узбекистане. Только активные каналы по категориям и с подробной статистикой.

uztelegram.com

O‘zbek tilida savodli yozishni biz bilan boshlang.

С нами вы научитесь грамотно писать на узбекском языке.

sarlavha.com

O‘zbek tilining sinonimlar lug‘ati. Saytda 3300 tadan ortiq so‘zlar, 900 ga yaqin sinonim so‘zlar to‘plamiga jamlangan.

Словарь синонимов узбекского языка на нашем сайте содержит более 3300 слов и 900 синонимов.

sinonim.uz
ibora.uz salsa.uz skripka.uz slovo.uz television.uz vatt.uz iboralar.uz resumes.uz havo.uz
Izoh.uz saytining bazasida jami 35 855 ta so‘z bor
Aloqa Telegram
© Izoh.uz — O‘zbek tilining izohli lug‘ati, 2014–2024
Obuna va GoodGroup loyihasi. 18+