Izoh.uz saytida dunyo so‘zining izohi va ma’nolari

dunyo

So‘zni do‘stlar
bilan ulashing

1. Butun borliq; koinot, olam.

Bogʻ koʻrki — bodom, Dunyo koʻrki — odam. Maqol
Til kichik boʻlsa ham, dunyoni buzadi. Maqol
Dunyoda onadan aziz, onadan moʻtabar inson yoʻq. Gazetadan
Dunyoda eng dahshatli narsa — yolgʻizlik. T. Ashurov, Oq ot

2. Borliqning, mavjudotning ayrim boʻlaklari yigʻindisi, toʻplami.

Yulduzlar dunyosi.

3. Jonli tabiatning ayrim qismlari, ular yashaydigan muhit.

Hayvonot dunyosi. Oʻsimliklar dunyosi.
Tabiatni muhofaza qilish, jumladan, hayvonot dunyosini saqlash hozirgi davrda muhim ahamiyatga ega. Gazetadan
Darhaqiqat, bular [ilonlar] gazandalar dunyosining turqi eng sovuq, zahari eng oʻtkir vakillari hisoblanadi. Fan va turmush
Karib dengizida joylashgan Yamayka oroli nabotot dunyosining boyligi va rang-barangligi bilan mashhurdir. Fan va turmush

4. Ijtimoiy hayot yoki turmushda yuz bergan (mavjud boʻlgan) holatga nisbatan, unga qarama-qarshi boʻlgan boshqa bir holat.

Shu yoʻsin qizlar oʻzlarining bir oʻrtoqlarini xotinlik dunyosiga uzatib, majlisdan tarqalishdilar. A. Qodiriy, Oʻtgan kunlar

5. Atrofimizni oʻrab turgan butun mavjudot; atrof muhit.

Torga — tor dunyo, kengga — keng dunyo. Maqol
[Otabek] Tush koʻrar edi: Dunyoni qorongʻilik bosgan emish. A. Qodiriy, Oʻtgan kunlar
Koʻzim ochding, men dunyoni keng koʻrdim, Oʻzimni ham odamlarga teng koʻrdim. H. Olimjon, Asarlar

6. Yer yuzi va undagi barcha odamlar, insoniyat.

Oʻzbek paxtakorining dovrugʻi dunyoga taraldi.
Butun dunyo seni olqishlar. U. Ismoilov, Saylanma

7. Yer yuzi, undagi barcha qitʼalar, mamlakatlar.

[Haydar ota:] Agar birov menga qolgan umringni dunyoni sayohat qilib oʻtkazasanmi? desa, hech oʻylab oʻtirmasdan, shu supani bera qol, der edim. A. Qahhor, Asror bobo
Agar dunyoning narigi burchagiga sizni opichlab borishga toʻgʻri kelsaydi, men sevina-sevina bajarardim. Oybek, Tanlangan asarlar
dunyo aholisining teng yarmi guruch bilan tirikchilik qiladi. K. Mahmudov, Qiziqarli pazandachilik

8. Hayot, tiriklik.

Bu dunyo oʻtar-ketar, yuzi qoralik qolar. Maqol
Dunyoning ishlari shunaqa ekan, doʻstim. K. Yashin, Hamza
Kim dunyodan toq oʻtibdiki, siz oʻtasiz? S. Ahmad, Ufq
Dunyo qiziq ekan. Qachon qarasangiz, yetdim deganda qoqilasiz. Oʻ. Hoshimov, Qalbingga quloq sol

9. koʻchma Kishining maʼnaviy, ruhiy olami, hayoti.

Sehrlar dunyosi. Ruhiy dunyo. Xayollar dunyosi. Maʼnaviy dunyo. Tafakkur dunyosi.
Sherbekning dunyosi boʻm-boʻsh, huvillab qolgandek tuyuldi. Nigorasiz turmushida halovat boʻlarmidi! S. Anorboyev, Oqsoy
Soʻnagul oʻz dunyosi bilan band edi. A. Muxtor, Davr mening taqdirimda
Ayazarda onaning ruhiy dunyosi, farzandga boʻlgan muhabbati, orzu-oʻylari aks etadi. Saodat
Shu birgina soʻz uning [ Madumarning] butun ichki va tashqi dunyosini oʻzida aks ettirgan edi. M. Ismoiliy, Fargona t.o.
Xayollar dunyosi keng, oʻtkir fikrli bu hassos qiz berilib, kichik-kichik hikoyalar yozar edi. Oybek, Nur qidirib

10. Maʼlum bir ilm-fan, kasb-hunar, ijtimoiy hodisa sohasi.

Adabiyot dunyosi. Odamiylik dunyosi. Taʼlim-tarbiya dunyosi.
Adabiyot dunyosida ikki turli tanqid bor: jiddiy tanqid va hajviy tanqid. A. Qodiriy, Kichik asarlar

11. Maʼlum bir ijtimoiy tuzumga, oʻziga xos madaniy va ijtimoiy-tarixiy xususiyatlarga ega boʻlgan omillar bilan birlashgan kishilik jamiyati va u mavjud boʻlgan davr.

Qadimgi dunyo. Kapitalizm dunyosi. Sivilizatsiya dunyosi.

dunyo soʻzi qatnashgan jumlalar:

Bevafo dunyo yoki dunyoyi bevafo

Hech kim rahm qilmaydigan, oxiri oʻlim bilan tugaydigan, beqaror hayot.

Pushti panohimizdan ayrilganimiz rostmi? Oh, bevafo dunyo! U. Qodirov, Yulduzli tunlar
Bu bevafo dunyoda istak va zaruratdan tashqari koʻngil degan narsa ham bor ekan. M. Ismoiliy, Fargʻona tong otguncha
Ey dunyoyi bevafo! Onangdan ayrilibsan, jiyan! Oybek, Tanlangan asarlar

Besh kunlik dunyo

Oʻtkinchi hayot, qisqa umr.

Umr qisqa, besh kunlik dunyoda zavq surish gʻanimat. Oybek, Tanlangan asarlar
Besh kunlik dunyoning loyqa suvini nima qilasan, jannatdagi havzi kavsarni oʻyla, ablah! Oybek, Tanlangan asarlar

Bu dunyo

Diniy tasavvurlarda yerdagi mavjud, yashab turilgan dunyo (narigi dunyo, oxiratga nisbatan).

Hammamiz ham bu dunyoga mehmonmiz. J. Sharipov, Xorazm
Uning vasliga yetgan yigitning armoni boʻlmasa kerak bu dunyoda! K. Yashin, Hamza

Dunyoga kelmoq

Tugʻilmoq.

Bu bosh dunyoga kelib, nimalarni koʻrmadi-a? A. Qodiriy, Oʻtgan kunlar
Mohirabonudan ikki oʻgʻil va ikki qiz dunyoga kelib, toʻngʻichi — Azizbek toʻrtinchisi bizning Zaynab edi. A. Qodiriy, Oʻtgan kunlar

Dunyodan oʻtmoq (yoki ketmoq)

Oʻlmoq, vafot etmoq.

— Tarxon janoblari dunyodan oʻtibdilar, — dedi sardor yonidagi otliqqa. Mirmuhsin, Meʼmor
Taqdir oramizga judolik savdosini soladigan boʻlsa, Iqbol dunyodan ketdi, deb qoʻya qoling. N. Safarov, Tanlangan asarlar
Polopon vaqtingizdayoq yorugʻ dunyodan ketdingiz. Mirmuhsin, Meʼmor

Dunyo ilmi

Dunyoviy ilm, real ilmiy mushohada.

Kamina oxirat ilmiga, siz dunyo ilmiga mohirsiz. A. Qodiriy, Kichik asarlar.

Dunyoyi qoʻtir yoki qoʻtir dunyo

Har xil hodisalar, sarguzashtlar (yaxshilik, yomonlik, moʻlchilik, kamchilik va shu kabilar)ga toʻliq boʻlgan olam.

Bu qoʻtir dunyoda shunaqa odamxoʻrlar borligiga hech aqlim yetmaydi. M. Ismoiliy, Fargʻonat.o.

Dunyoni tanimoq

Hayot tarzidan, turmush sirlaridan boxabar boʻlmoq; bilim olmoq.

Oʻqituvchi dunyoni tanitadi, olamni chinakamiga tushuntiradi. Fan va turmush

Sen dunyo yuzini koʻrib, chaqaloq ovozing jaranglagan kun sodda qishloq xotinlari bilan uyimizda kichkina bir toʻy yasar edik. Oybek,Tanlangan asarlar

Yolgʻon dunyo

Narigi dunyo (oxirat)ga nisbatan soxta, aldamchi, oʻtkinchi hayot.

Aslini soʻrasangiz, hammamiz bu yolgʻon dunyoga mehmonmiz. K. Yashin, Hamza
Bu yolgʻon dunyoda qancha ot surib, nechogʻliq javlon urganimiz bilan bir kun borar yerimiz shul tuproq ekan, hayhot! S. Siyoyev, Yorugʻlik

Yorugʻ dunyo

Yer yuzi, tiriklik olami; roʻshnolik.

Bu yorugʻ dunyoga nima uchun keldik? Hamza, Asarlar
Biz yorugʻ dunyoni koʻrish uchun tugʻilganmiz, Turgʻunoy! A. Qahhor, Asarlar

Ikki dunyo ayn. u dunyo-bu dunyo.

Oʻzi juda aqlli-da ustozimiz, bunaqangi aqlli odamni ikki dunyoda ham topolmaysiz. X. Toʻxtaboyev, Shirin qovunlar mamlakati
Unday kelin endi ikki dunyoda ham bu jahonga kelmaydi. E. Rayimov, Ajab qishloq
Men ikki dunyoda rozi emasman. S. Ahmad, Yulduz
Jon birodar, xudo xayringni bersin, bu yaxshiligingni ikki dunyoda unutmasman. S. Siyoyev, Yorugʻlik

Miri (biri) kam dunyo

Nimadir yetishmaydigan, nimadir kam boʻlgan hayot, turmush.

Bobolar: Dunyoniki miri kam ikki! deganlar. A. Qodiriy, Oʻtgan kunlar
Biri kam dunyo. T. Ashurov, Oq ot
Bir kam dunyo emas bizning bu dunyo: Barcha hujayrasi tugal bir olam. B. Boyqobilov, Meni kuting, yulduzlar

U dunyo-bu dunyo

1. Har ikki dunyo, hozirgi mavjud dunyo va narigi — ilohiy dunyo.

[Volidamiz:] — U dunyo-bu dunyo meni rozi qilaman desang, shu xotinni rozi qil! — dedilar. A. Qahhor, Qoʻshchinor chiroqlari
Kimda-kim birovga qoʻl berib, ixlos qoʻysa, u dunyo-bu dunyo xor boʻlmaydi. Mushtum

2. Aslo, sira ham, hech qachon.

Vasya Tyuminga: — Xayr endi, uka, bu qilgan yaxshiliging u dunyo-yu bu dunyo esimdan chiqmaydi, — dedim. A. Qahhor, Qoʻshchinor chiroqlari
Sartarosh u dunyo-bu dunyo xor boʻlmaydi. E. Rayimov, Ajab qishloq
Bordi-yu, turmush quradigan boʻlsang, u dunyo-bu dunyo sendan rozi emasman. S. Karomatov, Oltin qum

U (yoki narigi) dunyo

Diniy tasavvurlarda kishilar oʻlgach, unda abadiy yashaydigan, ilohiy, oxirat dunyo (bu, yashab turilgan dunyoga nisbatan).

U dunyoda shuncha narsa boʻlsa ham, hech kim bu dunyodan ketkisi kelmaydi-ya. P. Tursun, Oʻqituvchi
Bir-ikki kunning ichida koʻzlari ich-ichiga tushib, narigi dunyoga ravona boʻldi. A. Qodiriy, Gʻirvonlik Mallavoy

Foniy dunyo

Oʻtkinchi, omonat hayot, tez oʻtib ketadigan umr.

Usta goʻr va jahannam azobini foniy dunyoda bir martaba boʻyniga olib qoʻygani uchun uncha tan tortmadi. A. Qahhor, Asarlar
Xoʻsh, siz bu foniy dunyo lazzatidan kechgan tarki dunyo qilgan piri murshidlardan biri ekansiz K. Yashin, Hamza

Qaytib kelmas dunyo

aynan U dunyo.

Oʻzbek oyim boʻlsa, eski gina va adovatlarni qaytib kelmas dunyosiga joʻnatdi. A. Qodiriy, Oʻtgan kunlar

Oʻtar (yoki oʻladigan) dunyo ayn. foniy dunyo

Qani, ayt, bu oʻtar dunyo zeb-u ziynatlari, bu mozordagi omborlarda yotgan hisobsiz baytulmollar faqat senga kerakmi? K. Yashin, Hamza
Farmon, kel, oʻladigan dunyoda bir otamlashaylik. U. Ismoilov, Saylanma

Bir dunyo

Juda koʻp, behisob, beadad; juda katta.

— Oh, dadajon, men shoʻrli qarigan chogʻingizda sizga bir dunyo tashvish boʻldim, — dedi Eʼzozxon. H. Gʻulom, Mashʼal
Gʻalaba! Olti harfdan iborat bu soʻzda bir dunyo qaygʻu, quvonch va maʼno bor! N. Safarov, Olovli izlar
Hovliga chiqdim. Meni bir dunyo yumush kutib turgan edi. S. Siyoyev, Yorugʻlik

Dunyoga ustun boʻlarmiding

Umr qisqa, abadiy yasharmiding degan maʼnoni ifodalaydigan ibora.

Dunyodan toq oʻtmoq

Turmush qurmasdan, yolgʻiz yashamoq, soʻqqabosh boʻlmoq.

Na xotin, na bola-chaqa bor. Dunyodan toq oʻtdik hisob. Oybek, Tanlangan asarlar
Endi er degan shu boʻlibdimi? Bundan koʻra dunyodan toq oʻtgan yaxshiroq, yolgʻiz yurgan tinchroqdir. A. Qodiriy, Oʻtgan kunlar

Dunyodan chiroqchisiz bormoq (yoki oʻtmoq)

Farzandsiz oʻtmoq, befarzand qolmoq.

Yoshim oltmish toʻrtga yetdi, oʻgʻlim-qizim boʻlmadi Dunyodan chiroqchisiz boraman. A. Qodiriy, Oʻtgan kunlar

Dunyo koʻziga qorongʻi boʻlmoq (yoki koʻrinmoq)

Nihoyatda gʻamga botmoq, yuragi siqilmoq; oʻta ruhiy tushkunlikka tushmoq.

Talʼat birinchi kursdanoq Hamida degan qizni sevib qolgan, shu qiz boʻlmasa, dunyo koʻziga qorongʻi, bemaʼni koʻrinib ketardi. Oʻ. Hoshimov, Qalbingga quloq sol

Dunyo koʻrgan

Turmush tajribalariga ega, hayotning bordi-keldisini koʻrgan.

Birodar Ikirom, siz dunyo koʻrgan bir kishisiz. A. Qodiriy, Oʻtgan kunlar

Dunyoni suv bossa, toʻpigʻidan kelmaydi (yoki toʻpigʻiga chiqmaydi)

Begʻam, parvoyi falak, hech narsadan tashvishi yoʻq kishi haqida.

Bu odamlar toʻrt ishkali but, dunyoni suv bossa, toʻpigʻiga chiqmaydigan kishilarday bamaylixotir, huzur qilib kulishardi. A. Qahhor, Qoʻshchinor chiroqlari

Dunyoni tanigan yoki dunyodan xabardor

Koʻpni koʻrgan, koʻp biladigan, bilimli.

Dunyo turguncha turing (yoki tursinlar)

Uzoq umr koʻring.

Dunyo turguncha turing, asti gʻam koʻrmang. K. Yashin, Hamza

Ikki dunyo bir qadam

Pisand emas, hech gap emas (koʻpincha masofa haqida).

Sayoq uchun ikki dunyo bir qadam. Oybek, Tanlangan asarlar

Ikki dunyoda

Sira ham, aslo, hech.

— Men u bilan ikki dunyoda chiqisha olmayman, — dedi Tojiboy. P. Tursun, Oʻqituvchi

Tarki dunyo qilmoq

Hayot lazzatlaridan voz kechmoq.

Asli oʻzim tarki dunyo qilganman. Oʻzbek xalq dostonlari

DUNYO so‘zining sinonimlarini Sinonim.uz saytida qidirib ko‘ring.

ДУНЁ so‘zining kirillcha yozilishi Lotin.uz sayti tomonidan taqdim qilingan.

Saytdagi o‘rni

2351

So‘zning teskari yozilishi

oynud

Harflar soni

Ko‘rishlar soni

2968

dunyo so‘zi ishlatilgan saytlarni internetda qidiring

Google Яндекс Bing

Siz uchun qiziq bo‘lishi mumkin bo‘lgan so‘zlar

abstraksiya Venera abr Nizomiy abzal Boltiqbo‘yi aʼzam abituriyent Yupiter

dunyo so‘zining ma’nosi va izohi bilan batafsil tanishib chiqamiz. O‘ylaymizki, endi siz Izoh.uz saytidan foydalanib, dunyo so‘zini lotin va kirill alifbosida to‘g‘ri va o‘z o‘rnida ishlata olasiz.

Alifbo bo‘yicha

A B D E F G H I J K L M N O P Q R S T U V X Y Z O‘ G‘ Sh Ch

Izohli lugʻat Savodxon loyihasi bilan hamkorlikda yaratildi. Savodxon dasturi matndagi imlo xatolarini aniqlash va tuzatishga imkon beradi.

Batafsil

Tasodifiy so‘zlar

Hammasini ko‘rish

Yangi so'zlar