худо

[Ибн Ямин:] Қизимнинг жонини аввали худо, қолаверса, сиз асраб қолдингиз. К. Яшин, Ҳамза

— Агар эшикни ёпиб ухласанг, азбаройи худо, ҳужрангда бир ҳафтагача тонг отмайди, — деди Мирвали. А. Қодирий, Кичик асарлар

Ишқилиб, ўзингга эҳтиёт бўл, болам. Бирор фалокатдан худо асрасин! Ҳ. Ғулом, Машъал

[Меъмор:] Мунофиқлардан худо асрасин! Мирмуҳсин, Меъмор

Кейин Гулнорга худо беради, у эрка, арзанда хотин бўлиб, эрга суялиб, кўнглига нима келса, шуни қилади. Ойбек, Танланган асарлар

Қоронғида яхши ажратолмадим, тусини ғира-шира анови қора Ҳомидга ўхшатдим. Тағин уми, бошқами, худо билсин, шатир-шутур қилди-да, чиқиб кетди. А. Қодирий, Ўтган кунлар

Агар бу касаллик маҳаллий халққа ҳам юқса борми, худо кўрсатмасин, ана унда кўрасиз қиёматни К. Яшин, Ҳамза

Зулфизар ичида: Худо кўтарсин сени деди-ю, қадамини тезлатди. К. Яшин, Ҳамза

— Китоблар икки жойда ёлғон айтишни маъқул деган эканлар: биттаси — эр-у хотиннинг орасида, иккинчиси — икки мўминни битириш учун. Буни худо раҳмати домлам ўқиб берар эдилар, — деди Сафар бўзчи. А. Қодирий, Меҳробдан чаён

[Олчинбек:] Бошингизга тушган ишларнинг ҳаммасидан хабарим бор. Кампирнинг ўлими, худо раҳмат қилсин, янги ёзган асарларингизнинг йўқ қилиниши К. Яшин, Ҳамза

Хўжайин тоғанг жуда худо урган одам. Уйинг куйгур, шунча йил ишлатиб, энди кўчага ташлайдими? Ойбек, Танланган асарлар

Мен сизга: Қопонғич, жангари ит топиб келинг! десам, худо урган итни топиб келибсиз. Латифалар

[Одам] Ичкиликка берилдими, худо урди, Обрў кетиб, йўқолади тамом бурди. Т. Йўлдош

Кейин ерга энгашиб, қўлларига катта бир тош олдилар. Юрагим шув этди: Оббо, худо урди, дедим. П. Турсун, Ўқитувчи

Қўйинг-эй, Раҳимжон, гапирманг-эй! Худо урди-кетди. Қизим қўлингизга тушгандан бери бир кун рўшнолик кўрмади. А. Қаҳҳор, Сароб

Мени худо урибдими, ундай деганим йўқ.

Жон биродар, худо хайрингни берсин, бу яхшилигингни икки дунёда унутмасман. С. Сиёев, Ёруғлик

Худо ҳақи, одам ҳаддан ташқари қўрқса, қизиқ бўлар экан. А. Қаҳҳор, Сароб

[Матпано:] Худога нима ёздим? Наҳот утган-кетганнинг қўлига термилиб, қариб-чириб адо бўлажакман? С. Сиёев, Ёруғлик

Гулсумбиби қизининг бошини силади, йиғлаб гапирди: — Қўй, қизим, Нури туҳмат қилган бўлса, худога солдим. Ўзи бир кун жазосини тортар, бир кун изза бўлар. Ойбек, Танланган асарлар

Худога топширдим, Кумуш, қазом етиб кўролмай қолсам, мендан рози бўл! А. Қодирий, Ўтган кунлар

Худога шукур, тўй кўрдим, чимилдиққа кирдим, орзу-ҳавас кўрдим. И. Раҳим, Чин муҳаббат

[Отабек:] Тузукмисиз, ота? — Худога шукур! — деди Ҳасанали. А. Қодирий, Ўтган кунлар

— Худойимдан ўргилайки, — деди Кумуш энтикиб ва даҳшатланиб, — ёмонларнинг жазосини ўзи берган. А. Қодирий, Ўтган кунлар