Izoh.uz saytida kayf so‘zining izohi va ma’nolari

kayf

So‘zni do‘stlar
bilan ulashing

1. Ruhiy holat; kayfiyat.

Kayfi yaxshi. Kayfi chogʻ. Kayfini buzmoq.
Kambagʻal uchun oʻz haqini talab qilish ham qiyin. Chunki xoʻjayinning xursand va xursand boʻlmagan chogʻlari boʻladi. Oldin uning kayfini bilish kerak. Oybek, Tanlangan asarlar
Darhaqiqat, mingboshi bugun tetik, kayfi joyida koʻrinardi. M. Ismoiliy, Fargʻona tong otguncha
Ruzvon xola oʻzining qaygʻuli gaplari bilan oʻgʻlining kayfini buzib qoʻyganini payqab achindi. A. Muxtor, Opa-singillar

2. Kishining yaxshi, yoqimli, huzur-halovatli holati.

Agar oʻz kayfingizdan kechsangiz, yaxshi bilingizki, bir emas, ikki jonni azobdan qutqargan boʻlasiz, onajon! A. Qodiriy, Oʻtgan kunlar
Bir bechoraning sizning kayfingiz uchun azob emas, chekkan xoʻrligini oʻylab, har kuni bir qat etdan tushaman. A. Qodiriy, Oʻtgan kunlar

3. Biror narsa taʼsiridan yuz beradigan yoqimli, koʻtarinki (rohatbaxsh) his-tuygʻu, hissiyot.

Kechalar kayfi, Oqshomlar fayzi. M. Shayxzoda.
Yangi yerni obod qilishda oʻzgacha kayf bor. Oybek, Oltin vodiydan shabadalar
Sheʼr kayfi kun boʻyi qildi betoqat. S. Zunnunova.
Uning mayin, qoʻngʻiroqdek yangroq, shirali ovozi Hamzaga alohida kayf bagʻishladi. K. Yashin, Hamza

4. Ichkilik va boshqa mast qiluvchi (kayf beruvchi) narsaning taʼsiri, taʼsir etish xususiyati.

Aroqning kayfi. Nashaning kayfi.
Afyunning kayfi qursin, domla, sizni odamgarchilikdan chiqarib qoʻyibdi. H. Gʻulom, Mashʼal
Tantiboyvachcha kechagi bazm va ichkilik kayfini butun kun choʻzilgan uyqu bilan tiniqtirib, qoʻrgʻon eshigidan bogʻ tashqarisiga chiqdi. Oybek, Tanlangan asarlar
Chinni kosa besh-olti bor qoʻldan qoʻlga oʻtgandan keyin, har ikkovining ham boshi xiyli ogʻirlashib, kayf gʻalaba qila boshladi. H. Gʻulom, Mashʼal

5. Ana shu narsalar, uning kayfi taʼsirida (ichish, chekish va shu kabilar natijasida) yuzaga keladigan ruhiy holat; mastlik.

Besh-olti qadam narida kayf bilan aljirayotgan yigitlarning biri kelib, unga tegajaklik qildi. S. Zunnunova, Koʻk chiroqlar

6. so‘zlashuv tili Umuman, kayf beruvchi narsa (nos, sigareta va boshqalar).

Kayfi uchmoq

Nihoyatda qoʻrqmoq, choʻchib, oʻzini yoʻqotish darajasiga yetmoq.

— Bundoq deng-da. Kayfim uchib ketdi-ya! — dedi qori va yoqasini katta ochib, koʻkragiga uch marta tufladi. A. Qahhor, Qoʻshchinor chiroqlari

Kayfini surmoq

1. Rohat-nashʼasini tuygan holatda boʻlmoq.

Chilla havosini simirib, Qish sayrining kayfini surdim. S. Akbariy, Mehrigiyo
Halol ishlab, turmushni gullatish, kayfini surish kerak. Oybek, Oltin vodiydan shabadalar

2. Mastlik (kayf) taʼsirida boʻlmoq, uning taʼsiridan huzur, rohatda boʻlmoq.

Aroqning kayfini surmoq.
Mirali buva koʻknorini ichib, kayfini suraveradi. E. Raimov, Ajab qishloq
Ana, bangi toʻra yumshoq kursida afyunning kayfini surib, koʻzlari suzilib oʻtiribdi. S. Siyoyev, Avaz

Kayfi qochmoq

1. Kayfi (mastligi) tarqamoq;

2. Kayfiyati buzilmoq.

Toʻraning nihoyatda kayfi qochdi, jahl otiga minib, oqsoqol bilan imomni yeb qoʻygudek yovvoyi qarash qildi. J. Sharipov, Xorazm

Kayf qilmoq

1. Ichkilik, nasha va shu kabilar kayfi taʼsirida boʻlmoq.

Aroq ichib kayf qilmoq.
Salom keyingi vaqtlarda ishdan koʻpincha kech va kayf qilib, baʼzan, hatto oʻlgudek mast boʻlib keladigan boʻlib qoldi. H. Ahmar, Kim haq?
Mirali buvani qoʻrqitamiz. Hozir koʻknorini ichib, kayf qilib oʻtiribdi. E. Raimov, Ajab qishloq

2. Biror narsaning yoqimli taʼsirida boʻlmoq; rohatlanmoq.