Izoh.uz сайтида бутун сўзининг изоҳи ва маънолари

бутун

Сўзни дўстлар
билан улашинг

сифат

1. Синмаган; синдирилмаган; шикастланмаган; синиқ-мертик жойи йўқ.

Бутун нон. Бутун коса. Бутун ғишт.
Мураббия ҳалиги қўли синган қўғирчоқни олиб, ўрнига бутун қўғирчоқни ётқизиб қўяётган экан. Ойдин, Болалик уйда ғийбат йўқ
Улар синиқ жомашовни ҳамон бутун жомашов демоқдалар. Муштум
Кўприк бутунми ёки мажақлаб ташландими — бу унга қоронғи. И. Раҳим, Чин муҳаббат
Сиртим бутун бўлса ҳам, ичим тутун. А. Мухтор, Қорақалпоқ қиссаси

2. Йиртилмаган, тешилмаган, йиртиқ жойи, тешиги йўқ.

Бутун калиш. Бутун қоп.
Арслоннинг ўша тўни ҳали бутун, эскирмаган. С. Зуннунова, Кўк чироқлар
Қуда-андани ўйлаган ойим сенга бутунгина маҳси ҳам кийгизиб юбормабди. Ойбек, Танланган асарлар

3. Бузилмаган, очилмаган; яхлит.

Бутун консерва.
Бой айтади: — Бутун бергин пулимни, Кўп сўйлатиб қичитмагин тилимни. Эргаш Жуманбулбул ўғли

4. Расо, тўлиқ.

Эси бутун одам. Хайр қилсанг, бутун қил. Мақол
Орзиқул опамнинг онаси: Насибанг бутун бўлсин, болам деб, дадамга нон тишлатди. С. Сиёев, Ёруғлик

5. мат. Каср қисми бўлмаган.

Бутун сонлар. Икки бутун ўндан беш. Беш бутун бир тақсим икки.

6. Бор(и), борлиқ, барча, ҳамма.

Бутун имкониятлардан фойдаланмоқ. Воқеани бутун тафсилоти билан айтиб бермоқ. Бутун куч, бутун ғайрат улуғ вазифаларни бажаришга қаратилган.
Унинг бутун вужудидан ёшлик, навқиронлик, балоғат тантанаси акс этиб турарди. С. Аҳмад, Уфқ
Бутун борлиғидан гупуллаб хушбўй атирнинг ҳиди ҳам келиб турибди. Х. Тўхтабоев, Ширин қовунлар мамлакати

7. Ўрин, жой, макон билдирувчи сўзлар билан келганда, уларни таъкидлаб ёки бутунисича, яхлит кўрсатиш учун хизмат қилади.

Бутун бир институтда ундан чиройли қиз йўқ эди. О. Ёқубов, Эр бошига иш тушса
Ошнинг ҳиди бутун уйни тўлдирди. П. Турсун, Ўқитувчи
Тош фонуслар парпираб ёниб, бутун боғни чароғон қилиб турибди. Х. Тўхтабоев, Йиллар ва йўллар
Собир бутун дунёни унутганди, унинг атрофида қоғоз, қалам ва айтмоқчи бўлган сўзлардан бўлак ҳеч нарса йўқ эди. О. Мўминов, Хиёбондаги уч учрашув
Бу кўзлар учун бутун оламни ҳадя этса арзирди. Ж. Абдуллахонов, Орият
Бутун Фарғона водийсида Чортеракдан олдин ўрик пишмайди. С. Аҳмад, Уфқ

8. Ўрин, жой, макон ёки кишилар жамоасидаги барча кишиларни билдиради.

Азон паллада бутун Қорабулоқ тоққа жўнади. М. Исмоилий, Фарғона тонг отгунча
Бутун Яккатут, балки бутун олам уйқуга чўмганди. Н. Фозилов, Дийдор
Бугун Чимён қишлоғини бутун мамлакатимиз билади. Газетадан
Ердан қор кетиши билан кўчиб келиб, бутун оила чумолидай ишлар эдик. Ойбек, Танланган асарлар

9. Вақт, муддат билдирувчи сўзлар билан келиб, шу сўз орқали ифодаланган вақт, муддатнинг бошидан охиригача бўлган чегарасини, оралиғини ифодалайди.

Бутун йил.
Қутидор эса бутун кун меҳмонхонасига келиб-кетиб турган кўнгил сўровчи ошна, ёр-дўстлари билан овора бўлди. А. Қодирий, Ўтган кунлар
Эрталаб далага жўнайди. Бутун кун ер ҳайдайди. Ойбек, Танланган асарлар
Бутун умр елкаларидан обкаш тушмаган. С. Аҳмад, Уфқ

бутун сўзи қатнашган жумлалар:

Бағри бутун

1. Армонсиз, бахтли, камчиликсиз, тўкис.

Дунёда бир бағри бутун киши йўқ экан-да, Ҳар кимнинг юрагида бир андуҳ. Мирмуҳсин, Меъмор

2. Бола-чақаси, яқин кишилари ўз олдида бўлган.

— Болаларингизнинг дийдорига тўйдингизми? — деб сўради. Эътибор опа. — Раҳмат, айланай Эътиборхон, бағрим бутун бўлиб қолди, — деди Роҳатбиби. Ҳ. Ғулом, Машъал
Бечора дадаси, тўй қилсам, ичкуёв бўлса, бағрим бутун, уйим обод бўлиб қоларди, деб ният қиларди. С. Аҳмад. Уфқ,

Бир бутун

Яхлит ёки бўлинмайдиган.

Бир бутун қилиб ясалган детал.
Тиктепа ерларини бириктириш, орадаги чегараларни бузиб, бир бутун қилиш қийин гап эмас. А. Қодирий, Ғирвонлик Маллавой

Бутун бошли

Катта, бутунлай; катта бир.

Бури увлаб, тикан чатнаб ётган ташландиқ жар-жилғалар ўрнида бутун бошли янги шаҳар барпо этилди. Ж. Холқосимов, Янги уйлар муборак
Янги ерлар очилиб, бутун бошли янги хўжаликлар ташкил топди. Ўзбекистон қўриқлари
Мен сендайлигимда бутун бошли оилани тебратганман. Э. Раимов, Ажаб қишлоқ

Нони бутун

Ризқ-насибали, тўқ, фаровон яшовчи, ҳеч нарсадан камчилиги йўқ.

— Худонинг ўзи азалдан шайхларнинг нонини бутун қилган,— деди Фозил ака. Н. Сафаров, Оловли излар
Сартарош у дунё, бу дунё хор бўлмайди. Ҳамма вақт нони бутун. Э. Раимов, Ажаб қишлоқ

Эси (ёки ақли) бутун

Эс-ҳуши жойида, ақлли.

Ҳар ҳолда, эсинг бутун-да, қурғур. Ҳ. Назир, Ёнар дарё
Ўқимаган бўлсанг ҳам, ақлинг бутун йигит экансан. П. Турсун, Ўқитувчи

Тегирмондан (ёки тегирмонга тушса) бутун чиқади

Жуда эпчил, уддабурон; ҳар қандай мушкул аҳволда ҳам ўзини йўқотмайдиган одам ҳақида.

Йигитмисан йигит! Кучли, тегирмондан бутун чиқади. А. Мухтор, Туғилиш
Ҳакимовни Сариосиёда тегирмонга тушса, бутун чиқади, дейишади. Муштум

БУТУН сўзининг синонимларини Sinonim.uz сайтида қидириб кўринг.

BUTUN сўзининг лотинча ёзилиши Lotin.uz сайти томонидан тақдим қилинган.

Сайтдаги ўрни

6348

Сўзнинг тескари ёзилиши

нутуб

Ҳарфлар сони

Кўришлар сони

4024

бутун сўзи ишлатилган сайтларни интернетда қидиринг

Google Яндекс Bing

Сиз учун қизиқ бўлиши мумкин бўлган сўзлар

ачин аччиқланиш абсцисса Авесто Низомий Хоразмий аббосий Шердор аблаҳ

бутун сўзининг маъноси ва изоҳи билан батафсил танишиб чиқамиз. Ўйлаймизки, энди сиз Izoh.uz сайтидан фойдаланиб, бутун сўзини лотин ва кирилл алифбосида тўғри ва ўз ўрнида ишлата оласиз.

Алифбо бўйича

А Б В Г Д Е Ж З И Й К Л М Н О П Р С Т У Ф Х Ц Ч Ш Э Ю Я Ў Қ Ғ Ҳ

Изоҳли луғат Savodxon лойиҳаси билан ҳамкорликда яратилди. Savodxon дастури матндаги имло хатоларини аниқлаш ва тузатишга имкон беради.

Батафсил

Тасодифий сўзлар

Ҳаммасини кўриш

Янги сўзлар