Izoh.uz сайтида сариқ сўзининг изоҳи ва маънолари

сариқ

Сўзни дўстлар
билан улашинг

сифат

1. Сомон, зарчува, тилла каби нарсалар тусидаги ранг.

Сариқ ипак. Оч сариқ ранг. Тўқ сариқ.
Дарахтлардаги сариқ барглар тўкилиб тугалган, ер юзи ўзининг қишки сариқ кийимини кийган эди. А. Қодирий, Ўтган кунлар

2. Малла ранг, малла (соч, тук, тери ҳақида)

Сариқ соч.
Рустам унинг узун мўйлови, кўкиш кўзларини қоплаб олгудай қуюқ, сариқ қошларини кўрди-ю, юраги шувуллаб, ўзини орқага ташлади. Ў. Ҳошимов, Қалбингга қулоқ сол

3. от Тухумнинг оқсил моддаси ўртасидаги қисми.

Тухумнинг оқини оқлаб е, сариғини — сақлаб. Мақол
Тухум пачақланган эди. Унинг сариғи оққа аралашиб, чаккамдан сизиб, юзимга оқмоқда эди. Ғ. Ғулом, Шум бола

4. от с.т. Жигардаги жиддий салбий ўзгаришлар туфайли тери, кўз оқининг сарғайишидан иборат оғир ва юқумли касаллик номи; гепатит.

Сариқ ирқ

Монголоид ирқининг эскирган номи.

Сариқ карточка

спрт. Футбол матчида ҳакам томонидан ўйинчига огоҳлантириш ёки енгилроқ жазо белгиси сифатида кўрсатиладиган сариқ рангдаги карточка.

Сариқ матбуот

кўчма Уятли, шармандали, жанжалли воқеаларни ёритишни мақсад қилиб олган, сийқа, саёз, паст сифатли матбуот ҳақида.

Иккинчи жиддий қусур шуки, кўпчилик қаламкашлар бугун сариқ матбуот саҳифаларида эълон қилинаётган ўртамиёна машқларни шеър, ҳикоя, дея улардан андоза олиб, ижод қилмоқдалар. Газетадан
Шунинг учун ҳам кўча-кўйда сариқ матбуотнинг воқеа изидан қувувчи ҳикояларига одамлар ўрганиб боряпти. Газетадан

Сариқ палак

қ.х. Вилт касаллиги, вилт.

Сариқ сув

айнан Назла.

Сариқ сумалак

1. Қамиш билан ёпилган том бўғотларида илк баҳорда ёғингарчиликдан кейин ҳосил бўладиган сарғиш сумалак;

2. Шундай сумалак ҳосил бўладиган давр, қишнинг охири.

— Қишдан қитдай бор: ҳут-ют, сариқ, сумалак, аямажиз қаторлашиб турибди, — кулумсиради Раъно. Ойбек, Улуғ йўл

Сариқ чақа

1. Чақа (пул); жуда оз миқдордаги, арзимас пул.

Мана, хотиним ётиб қолди, ёстиқдан бошини узишга дармони йўқ. Киссамда сариқ чақа йўқки, бечоранинг оғзига ёқар овқат берсам. Ойбек, Танланган асарлар;

2. Жуда паст, арзимайдиган; эътиборга лойиқ эмас.