семиз

1. Этли, тўладан келган; тўла.

1. Семиз одам.

2. Скамейкада ёш болали аёлнинг чап ёнида ўтирган семиз киши бепарво газета ўқирди. Ў. Ҳошимов, Қалбингга қулоқ сол

3. Саккиз меҳмон ичида иккиси бениҳоят семиз эди. Ойбек, Танланган асарлар

4. [Отабек:] Нега Зайнаб семиз-у, Кумуш озғин?! А. Қодирий, Ўтган кунлар

2. Яхши боқилган, этли; бўрдоқи; вазндор; ёғ босган.

1. Семиз қўй. Семиз гўшт.

2. Сувонжон августнинг охирларида ўрмон хўжалиги пунктига келди. Унинг қўлида тўртта семиз каклиги бор эди. С. Анорбоев, Оқсой

3. Шарофатхон бир катта косада семиз қўй гўштидан пиширилган шўрвадан келтирди. Ойбек, Танланган асарлар

3. қ. х. Ўсимлик учун фойдали моддаларга бой, серҳосил (ер ҳақида).

1. Тайёр, семиз ер бўлса, 50 центнердан ҳосил олиш унча қийин эмас. Газетадан

2. Тупроқ — семиз, сув — яқин, ҳавоси очиқ, Қуёш эса йил бўйи бу ерга ошиқ. М. Шайхзода

4. сўзлашув тили Йўғон, қалин, қаппайган; энли.

1. Семиз китоб.

2. Кечқурун гузарга кириб туринг, кўрасиз. Семиз-семиз сумка кўтарган хотинлар ўтаверади. С. Сиёев, Отлиқ аёл

3. Эни бир ярим, бўйи икки қарич чамаси келадиган газетанинг устига қора, семиз ҳарфлар билан: Туркистон вилоятининг газети деб ёзилган эди. М. Исмоилий, Фарғона тонг отгунча

4. Олдинда серсавлат Мойлихон ака, ортида жигарранг дипломат ва семиз қоғоз папка кўтарган Ғойибжон пилдираб келар эди. Н. Аминов, Қалтис хато