тайинла

1. айнан Тайин қилмоқ (этмоқ) 1

1. Мажлис вақтини тайинламоқ. Пенсия тайинламоқ.

2. Таъкидлаб, уқтириб айтмоқ; топшириқ бермоқ.

1. ўғлига ёмон гапларни тилга олмасликни такрор-такрор тайинларди. Мирмуҳсин, Меъмор

2. Волидангиз тайинлаб юбордилар, дарҳол Андижон қўрғонига бориб, бекларни тўпламоқ керак! П. Қодиров, Юлдузли тунлар

3. [Мавлонов:] — Бу кишининг аҳволидан хабар олиб туринг, — деб қаттиқ тайинлаб кетган эди. П. Турсун, Ўқитувчи

3. Мансабга, вазифа ёки ишга қўймоқ, белгиламоқ.

1. Ишга тайинламоқ. Директор қилиб тайинламоқ.

2. [Мусулмонқул:] Бу мадрасаларга, хизмати билан танилган уламодан мударрислар тайинлар эди. А. Қодирий, Ўтган кунлар

3. У, бойнинг уйида кечган воқеалардан хабардор бўлиб туриш учун, Шокир отанинг кампирини тайинлаган. Ойбек, Танланган асарлар

4. Бизга канал бўйича ўтов қилиб, ошпаз тайинлаб беришди. Ш. Ғуломов, Шонли авлод