касал

1. от Организм меъёрий ҳолатини, фаолиятини бузувчи нарса; касаллик, дард.

1. Сил касали. Рак касали. Тутқаноқ касали. Касалга чалинмоқ.

2. [Шокир ота:] Бурунги замонларда Ибн Сино, Луқмон Ҳаким ўтган. Улар ҳар бир касалга даво топган. Ойбек, Танланган асарлар

3. Онаси ўзининг касалини ҳам унутиб, унинг бошида парвона бўлди. Ў. Ҳошимов, Қалбингга қулоқ сол

4. Ёш бўлганидан касалини ўзи сезмаса керак. Касали ўқтин-ўқтин бир кўриниш бериб қўяди. Ойбек, Танланган асарлар

2. сфт. Организмининг меъёрий ҳолати, фаолияти бузилган, касалликка йўлиққан; бетоб.

1. Касал одам. Касал мол.

2. Хотиржам ишласин, деб касал онасини бировнинг қўлига ташлагим келмади. С. Зуннунова, Олов

3. Одам организмининг касал ёки шикастланган аъзоларини алмаштириш учун сунъий эҳтиёт қисмлар яратиш ғояси янгилик эмас. Фан ва турмуш

3. от Организмининг меъёрий ҳолати, фаолияти бузилган шахс, касалликка йўлиққан шахс; бемор.

1. [Шокир ота:] Ибн Синога касалнинг жони чиқмаган бўлса, бас экан, тузатар экан. Ойбек, Танланган асарлар

2. Икки қаватли мактаб биноси шошилинч суратда фронт ёқасидан келтирилган ярадор, касаллар учун бўшатилмоқда. Р. Файзий, Сен етим эмассан

4. от кўчма Нарса ёки унинг қисмидаги носоғ, бузуқ ҳолат; носозлик, иллат.

1. Ҳамма касал шундаки, сиз халқ кучига ишонмайсиз. Ш. Рашидов, Бўрондан кучли

2. У [Эркин] машинага бир қарашдаёқ касалини топади ва давосини қилади. Ҳ. Ғулом, Тошкентликлар

5. от кўчма Одатга айланган иш, хатти-ҳаракат.

1. — Саъвани яхши кўрасизми? — Отадан қолган касал бу, — кулиб жавоб берди Йўлдошев. Ёшлик

2. Демак, ёлғончилик касалига мубтало бўлган кишини ростгўй одамнинг қони билан даволаса бўлади. Х. Тўхтабоев, Ширин қовунлар мамлакати

3. Эрининг тўсатдан қайсарлик касали тутди. Тафаккур

6. от кўчма Умуман, бирор нарса истаги, шунга иштиёқ, интилиш; дард.

1. Ўзинг айт, агар менга шу касалингни бир оғиз билдирсанг, мен қайнатангга хат ёзмасми эдим А. Қодирий, Ўтган кунлар

2. Оилада ишнинг жуда ишкали — Холпошшанинг кийим-кечак касали. Муштум

касал сўзи қатнашган жумлалар: