тикла

1. Тик, вертикал ҳолатга келтирмоқ, тикка қилмоқ, тикка қилиб қўймоқ.

1. Йиқилган ғўза тупларини тикламоқ.

2. Жўрапошшо пастга тушиб, шотини тиклаб қўйди. М. Исмоилий, Фарғона тонг отгунча

3. Султон бўзчи камон сингари эгилган қаддини тиклаб, базўр ўрнидан турди. Н. Сафаров, Султон бўзчининг неваралари

2. Қурмоқ, бино қилмоқ, бунёд этмоқ.

1. Утган йилнинг баҳорида мана шу жойни тиклаб олдим. М. Абдулла, Кутилмаган меҳмон

2. Қурилиш майдонида иш жадал Биров палатка тиклаяпти, иккинчи бир киши чизмаларга белгилар қўйяпти. С. Кароматов, Бир томчи қон

3. Биргалашиб чўлда биринчи оқ уйни тиклаганмиз. Ўзбекистон қўриқлари

3. Йўқ бўлган, ишдан чиққан, хароб бўлган ва шу кабилар нарсаларни бор қилмоқ, асл ҳолига келтирмоқ.

1. Архитектура ёдгорликларини тикламоқ. Хўжаликни тикламоқ.

2. Водокачкани тиклагани ғишт, қум ташиш керак бўлганида, отининг туёғига мих қоқиб, оқсатиб қўйган ким эди? А. Қаҳҳор, Қўшчинор чироқлари

3. Хўжалик раҳбарларининг ишига — меҳнат аҳлининг саломатлигини тиклаш ҳақида қилаётган ғамхўрликларига қараб баҳо берилмоқда. Ўзбекистон қўриқлари

4. Цех қолоқликдан чиқиб, аввалги шуҳратини яна тиклади. Газетадан

5. Боис Эргашев радиостанцияни қайиққа ортиб, узилиб қолган алоқани тиклади. Н. Сафаров, Оловли излар

4. Унутилган, эсдан чиқиб кетган нарсаларни юзага келтирмоқ; бекор қилинган, рад этилган нарсаларни қайта жорий қилмоқ, қайтариб бермоқ.

1. Алоқа-муносабатларни тикламоқ. Ҳуқуқини тикламоқ.

2. Умид эслаб-эслаб, кейинчалик она алласининг деярли ҳаммасини тиклаб олди. Мирмуҳсин, Умид

5. Қайта ўз ўрнига, ишига қўймоқ.

1. Директор ноҳақ ишдан бўшатилганларни яна тиклади.

6. шв. Бошини кўтарган ҳолда тик қарамоқ.

1. Терсак дамини ичига олиб, тишини тишига қўйиб, кипригини қоқмай тиклаб қолди. Равшан

2. Ҳеч нимаман иши бўлмай, Ҳамма анграйиб тиклаб қолган. Муродхон