yetil

1. Meʼyoriy darajasiga yetmoq, tobiga kelmoq.

1. Nisholdaning qiyomi yetildi.

2. Kunlar isib, koʻtarilgan nam, Yerlar isib, yetilgan tuproq. Gʻayratiy

3. Yetilgan yerlar peshma-pesh boronalanib, ekishga taxt qilib qoʻyilmoqda. Gazetadan

4. Bu yil ham gʻoʻza obdan yetilgandan keyingina defoliatsiyani boshladik. Gazetadan

2. Oʻsib, rivojlanib, isteʼmol qilish, pishish darajasiga yetmoq; pishmoq.

1. Fosfor va kaliy oʻgʻitlari meʼyoridagidan ortiqroq berilsa, kartoshkaning yetilishi tezlashadi. Fan va turmush

2. Qovun qars etib yorildi. — Jonivor xoʻb yetilibdi-da, — dedi Madaminxoʻja qovunni kosa qilayotib. M. Ismoiliy, Fargʻona tong otguncha

3. Oʻsib, ulgʻayib balogʻatga yetmoq.

1. U boyoqishning nuridiydasi, yetilgan qizi birdan gʻoyib boʻlsin Oybek, Tanlangan asarlar

4. koʻchma Pishib yetmoq, dolzarb boʻlmoq.

1. Taʼlim-tarbiya saviyasini oshirishning yetilgan masalalari ishchanlik bilan hal etilayotir. Gazetadan

2. Shunday baʼzi yetilgan savollarimiz bor. H. Shayxov, Rene jumbogʻi

5. koʻchma s. t. Kayfi oshmoq; qattiq mast boʻlmoq.

1. Har kim bilan qadah urishtirib ichaverib, rosa yetilibdi.

6. kam qoʻll. Biror daraja, mavqe va shu kabilarga yetmoq, erishmoq; yetishmoq.

1. Bu oddiy dokladlardan emas, balki., yetim-kambagʻal bolalarning mana bugun oʻqituvchi boʻlib yetilganlari toʻgʻrisida taʼsirli bir qissa. P. Tursun, Oʻqituvchi

2. Hamza takallumi ifodali, mantiqli, zehni oʻtkir oʻz soʻzli yigit boʻlib yetilgan edi. K. Yashin, Hamza