етил

1. Меъёрий даражасига етмоқ, тобига келмоқ.

1. Нишолданинг қиёми етилди.

2. Кунлар исиб, кўтарилган нам, Ерлар исиб, етилган тупроқ. Ғайратий

3. Етилган ерлар пешма-пеш бороналаниб, экишга тахт қилиб қўйилмоқда. Газетадан

4. Бу йил ҳам ғўза обдан етилгандан кейингина дефолиацияни бошладик. Газетадан

2. Ўсиб, ривожланиб, истеъмол қилиш, пишиш даражасига етмоқ; пишмоқ.

1. Фосфор ва калий ўғитлари меъёридагидан ортиқроқ берилса, картошканинг етилиши тезлашади. Фан ва турмуш

2. Қовун қарс этиб ёрилди. — Жонивор хўб етилибди-да, — деди Мадаминхўжа қовунни коса қилаётиб. М. Исмоилий, Фарғона тонг отгунча

3. Ўсиб, улғайиб балоғатга етмоқ.

1. У боёқишнинг нуридийдаси, етилган қизи бирдан ғойиб бўлсин Ойбек, Танланган асарлар

4. кўчма Пишиб етмоқ, долзарб бўлмоқ.

1. Таълим-тарбия савиясини оширишнинг етилган масалалари ишчанлик билан ҳал этилаётир. Газетадан

2. Шундай баъзи етилган саволларимиз бор. Ҳ. Шайхов, Рене жумбоғи

5. кўчма с. т. Кайфи ошмоқ; қаттиқ маст бўлмоқ.

1. Ҳар ким билан қадаҳ уриштириб ичавериб, роса етилибди.

6. кам қўлл. Бирор даража, мавқе ва шу кабиларга етмоқ, эришмоқ; етишмоқ.

1. Бу оддий докладлардан эмас, балки., етим-камбағал болаларнинг мана бугун ўқитувчи бўлиб етилганлари тўғрисида таъсирли бир қисса. П. Турсун, Ўқитувчи

2. Ҳамза такаллуми ифодали, мантиқли, зеҳни ўткир ўз сўзли йигит бўлиб етилган эди. К. Яшин, Ҳамза