келиш

1. Келмоқ феълининг биргалик нисбати.

1. Улар овдан кеча келишди.

2. Одамлар пойгада ютиб чиққан чавандозга эргашгандай кетимиздан келишар, бир-бирларига гап маъқуллашарди. М. Мансуров, Ёмби

2. Ўзаро маслаҳатлашиб, маълум бир фикрга (хулоса, битим ёки қарорга) келмоқ.

1. Молнинг нархини келишиб қўймоқ. Шартлашувчи томонлар ўзаро келишдилар.

2. Баширжон бирпасда шунча режани хаёлан тузиб чиққач, сангтарош билан келишиб, қўл ташлашди. Н. Аминов, Суварак

3. Давлатимиз бирон катта ишга қўл урар экан, олдиндан ота-хонлар билан келишади. Фан ва турмуш

3. Муносиб тушмоқ; ярашмоқ.

1. Бу гаплар айниқса сиз билан менга келишмаса ҳам, азбаройи мени ташлаб қўйганингиздан айтди. А. Қодирий, Ўтган кунлар

2. Ҳамма жойи хўп келишган ўзига, Ишонинглар мендай подшо сўзига. Гулнорпари

4. Айрим сўзлар билан қўлланиб, мос тушмоқ, тўғри келмоқ маъносини билдиради.

1. Кетмон тутишга одатланган дағал қўллар игна ушлашга, қатим тортишга келишмаганидан диққати ошган Охун, бир кўзини қисиб давом этаркан, товуши шанғиллади. Ойбек, Танланган асарлар

2. Қачондан бери у газетхон, гапдон, самовар тўрида ўтириб чой ичадиган ва Сидиқжоннинг тили келишмайдиган, ақли етмайдиган гапларни айтиб, ҳаммани оғзига қаратадиган бўлди? А. Қаҳҳор, Қўшчинор чироқлари

3. Ўтган хатларимда кундошим билан муросамиз келишмай турганини кулгулик тарзида ёзган эдим. А. Қодирий, Ўтган кунлар

5. кам қўлл. Ўхшамоқ.

1. Жамолинг ўхшайди осмонда ойга, Қошинг келишибди қўлингда ёйга. Баҳром ва Гуландом