кўриниш

1. Кўринмоқ феълидан ҳаракат номи.

1. Маҳкам ҳозир унинг яна нимадир демоқчи эканини сезди, лекин унга кўринишни ҳам, гапиришни ҳам истамагани учун, бош ирғаб, эшикдан чиқди. П. Қодиров, Уч илдиз

2. Ташқи қиёфа; қиёфа.

1. Қиз, кўринишдан озарбайжон бўлса керак, русча гапирар, гап-сўзларидан анчагина саводли эканлиги кўриниб турар эди. Шуҳрат, Шинелли йиллар

2. Раҳим аканинг овозида одатдаги кесатиқдан асар ҳам йўқ, кўриниши серташвиш эди. Ф. Мусажонов, Ҳиммат

3. Кўзга кўриниб турган нарса, манзара.

1. Отабек табиатнинг шу кўркам ва латиф кўринишига мафтун бўлиб бир оз ётгандан кейин узоқ тин олиб қўйди. А. Қодирий, Ўтган кунлар

4. театр. Драматик асарда парданинг махсус декорация талаб этувчи ҳар бир қисми. Иккинчи парданинг бешинчи кўриниши.

1. Бир парда, етти кўринишли шеърий мусиқали драма. Гулдаста

5. Воқеа-ҳодиса кабиларнинг муайян намоён бўлиш ҳолати.

1. — Ишга совуққонлик, лоқайдлик ҳам, аслини олганда, интизомсизликнинг бир кўриниши, — деди Қурбонова. Ўзбекистон қўриқлари

2. Аммо сахийлик билан хасисликнинг бошқача кўринишлари ҳам бўларкан. Шукрулло, Жавоҳирлар сандиғи

кўриниш сўзи қатнашган жумлалар: