qadam

1. Yurish jarayonidagi har bir oyoq tashlash, oyoq bosish; odim.

1. Ildam qadam. Shaxdam qadam.

2. Ochil bu gaplarning menga aloqasi yoʻq, deganday qilib, qadamini tezlashtirdi. P. Qodirov, Uch ildiz

3. Yonidagi qorabayir buni sezdi shekilli, bir necha odim oʻtib, qadamini sekinlashtirdi. M. Ismoiliy, Fargʻona tong otguncha

4. Shu vaqt boloxona narvonida gurs-gurs qadam tovushi eshitildi. H. Gʻulom, Mashʼal

5. — Mardonqul aka, — dedi u boshliqning yurishiga qadamini moslab A. Muxtor, Boʻronlarda bordek halovat

6. Saodatxon bir-ikki qadam bosib, yana orqasiga qaytdi. S. Zunnunova, Yangi direktor

2. Har bir qadam oraligʻiga teng masofa, oraliq masofa.

1. — Assalomu alaykum, — dedim ostonadan bir qadam narida turib. E. Raimov, Ajab qishloq

2. Sodiq aminning kapasi ungurdan yuz qadamcha gʻarbda, togʻning soyabon boʻlib osilib tushgan kattakon toshi ostida edi. M. Ismoiliy, Fargʻona tong otguncha

3. koʻchma Ish-faoliyat, rivojlanish va shu kabilarda olgʻa siljish, ilgarilash.

1. Oʻrtoq Ahmedov, bu tajriba paxta agrotexnikasida olgʻa qoʻyilgan katta qadam, deydi. A. Qahhor, Qoʻshchinor chiroqlari

4. koʻchma Biror joy, tomonga qaratilgan, yoʻnalgan yurish; tashrif.

1. Uning bu yerdan qadami uzildi (kesildi). U biznikiga qadam bosmay qoʻydi.

2. Agar qadamimni boy sezib qolsa, Gulnorning ahvoli ogʻirlashmaydimi? Oybek, Tanlangan asarlar

3. Xayriyat, xayriyat, Abdurasul! Sening ham qadaming biz tomonlarga tushar ekan P. Tursun, Oʻqituvchi

4. Sening uchun keldi sovchi qadami Bahrom va Gulandom

5. koʻchma Ish-faoliyatdagi har bir xatti-harakat; amal.

1. Odam baʼzan bir marta notoʻgʻri bosib qoʻygan qadami uchun umrbod javob beradi. Oʻ. Hoshimov, Qalbingga quloq sol

2. Axir, kam gapirib, qadamini bilib bossa, ishini bilib qilsa va zimdan qora niyatlar yoʻlidan keta bersa, uni darhol bilish osonmi, axir? Sh. Rashidov, Boʻrondan kuchli

qadam soʻzi qatnashgan jumlalar: