тўй

1. Ейиш, ичишга бўлган талаби қонмоқ, қониб емоқ, ичмоқ, овқатга, сувга қонмоқ.

1. Еб тўймаган, ялаб тўймас Мақол

2. Қўл билан берганга қуш тўймас. Мақол

3. Суқ тўймас, ўғри бойимас. Мақол

4. Анвар Нигор ойимга раҳмат айтиб, тўйганини сўзлади ва қўл артар экан, чақалоққа гап қотди. А. Қодирий, Меҳробдан чаён

5. Камбағал халқ ўлиб-тирилиб меҳнат қилади-ку, қорни тўймайди, эгни бутун бўлмайди. Ойбек, Танланган асарлар

2. Сув, озуқага тўйинмоқ (ер ва ўсимликлар ҳақида).

1. Ғўзалар сувга тўйди. Ер тўймагунча, эл тўймас. Мақол

2. Қор сувига тўйган ер хамирдек юмшоқ эди. С. Аҳмад, Уфқ

3. Халқнинг ер тўйса, эл тўяди, деган нақлида ҳикмат кўп. Газетадан

3. кўчма Роҳатланиб мириқмоқ.

1. Уйқуга тўймоқ. Дийдорига тўймоқ. Тўйиб суҳбатлашмоқ. Йиқилган курашга тўймас. Мақол

2. У [Элмурод] ҳар гал бу йўлдан юрганда, узоқ-узоқларга тикилиб, сира тўймасди. П. Турсун, Ўқитувчи

3. Тўпа хола ўзини мунча тетик тутгиси, ҳориган кўзларини очгиси, табиатга тўйиб боққиси келади, аммо дармони йўқ. И. Раҳим, Ихлос

4. Кенг ҳовлининг ҳуснига хол бўлиб турган атиргуллар яқин кунларда очилиб, тўйиб бўлмайдиган жамолини намоён қилади. Ш. Рашидов, Бўрондан кучли

5. Тўйиб-тўйиб шўхлик, бебошлик, жиннилик қилсанг, водийни бошингга кўтариб қаҳқаҳа урсанг. Ф. Мусажонов, Ҳиммат

4. кўчма Чидаб, тоқат қилиб чарчамоқ, тоқати тоқ, безорижон бўлмоқ.

1. Ақл, инсоф билан иш қила-қила, энди жуда тўйдик. А. Қодирий, Ўтган кунлар

2. Мен ҳам тўйдим бу хўрлик, бу ҳақоратдан! М. Исмоилий, Фарғона тонг отгунча

3. Қишлоқ халқи Сарижўжа сувининг тошқинидан жуда тўйган экан. Ўзбекистон қўриқлари

тўй сўзи қатнашган жумлалар: