енг

1. Кураш, жанг ва шу кабиларда ғолиб бўлмоқ, ғалаба қозонмоқ, рақибини мағлубиятга учратмоқ.

1. Маккор девни енгмоқ. Мусобақада бизнинг командамиз енгди.

2. Йўлчи ҳам, Қора Аҳмад ҳам мушт билан бир-бирларини енга олмасликларига ишонч ҳосил қилишди. Ойбек, Танланган асарлар

2. кўчма Қаршилик, қийинчилик ва шу кабиларни бартараф этмоқ, уни йўқ қилмоқ, қийинчиликларни енгмоқ.

1. Ҳаёт нашидаси шу кураш, хавф-хатар, тўсиқларни енгиб ўтиш, интилиш бор учун ҳам қизиқ, лаззатли. С. Нуров, Нарвон

2. Жангчиларимиз босқинчиларнинг қаттиқ қаршилигини енгиб, Днепрдан ҳам кечиб ўтдилар. Назармат, Жўрлар баланд сайрайди

3. кўчма Таъсирини ўтказмоқ, таъсир кучи ғолиб келмоқ (дард, касал кабилар ҳақида).

1. Элгелдининг кўзларидаги ғазабни бахтсиз бир маъюслик енгган эди. А. Мухтор, Қорақалпоқ қиссаси

2. Ғам-койиш хийлагина енгиб қўйган Марасул кирди. А. Қаҳҳор, Оғриқ тишлар

4. Ўзига бўйсундирмоқ, ҳукмига олмоқ.

1. Жувон тойни бемалол енгиб кетаётган бўлса ҳам, қишлоқдан чиққунча, Асқар ота жуда толиқди А. Қаҳҳор, Хотинлар

2. Тўғри, беш-ўн кун қаттиқчиликни устимизга олиб, шу оз улов билан кўкламни енгиб олсак, кўп одамларнинг кўзи очилиб кетади. А. Қаҳҳор, Қўшчинор чироқлари

5. Гап билан устун келмоқ, ўз гапини ўтказмоқ.

1. — Абдишукурни худо гапга бичган, енгиб бўлмайди, — деди Жамолбой пихиллаб. Ойбек, Танланган асарлар

2. Ота ўғлини гап билан енгиб бўлмаслигини фаҳмлаб, ирғиб турди. С. Сиёев, Аваз

6. шева Ҳайдамоқ, минмоқ (аравани).

1. Балки у [аравакаш] ўз аравасини эмас, бой аравасини енгиб кетаётгандир. М. Исмоилий, Фарғона тонг отгунча