Izoh.uz сайтида дафтар сўзининг изоҳи ва маънолари

дафтар

Сўзни дўстлар
билан улашинг

от

1. Китобча шаклида тикилган, муқоваланган ва хат ёзиш ёки расм чизиш учун мўлжалланган тоза қоғоз варақлари.

Бир чизиқли дафтар. Катак дафтар. Расм дафтари.
Болаларникидай кулимсираган жуда жонли ва қандайдир баҳаё қоп-қора кўзлар дафтарлар устида ўйчан югуради. Ойбек, Нур қидириб
Шерали ҳозиргина эшитган гапларини апил-тапил дафтарига ёзгач, минбарга қараб қолди. С. Кароматов, Олтин қум
Отам менинг отли йигит, Дафтари гул хатли йигит. Бойчечак

2. Бирор кимса ёки нарса ҳақидаги саргузашт ҳикоя.

Унинг дафтари узун. Дафтар қилмоқ.

3. кўчма Борлиқ, ўзлик.

Ҳар ёнда гўзаллик ёймиш дафтарин. А. Орипов, Юртим шамоли

дафтар сўзи қатнашган жумлалар:

Вексель дафтари

Қарздорларнинг қарзлари ва уни тўлаш муддатлари қайд этиладиган ҳужжат.

Шуниси ҳам борки, вексель дафтарим қаердалиги эсимда йўқ. К. Яшин, Ҳамза

Кундалик дафтар

Ўқувчининг дарсларга қатнашиши, ўзлаштиришига оид маълумотлар қайд этилувчи дафтар.

ювган кирларини дазмол қилди, болаларининг дарсларини текширди, кундалик дафтарларини кўрди. С. Зуннунова, Олов

Нота дафтари

Мусиқа ноталари қайд этилган ёки этиладиган дафтар.

Симларга қўнган қушлар нота дафтаридаги нуқталар-у, шамол уларга қараб, куйни чалаётгандек эди. С. Нуров, Майсаларни аёз урмайди

Уй дафтари

Бир хонадон, оилада истиқомат қилувчиларнинг муайян ҳудудда, манзилда рўйхатга олинганлиги қайд этилувчи расмий дафтар.

Хотира (ёки кундалик) дафтари

Шахснинг ўз кундалик ҳаёти давомида кўрган-кечирганларини ёзиб борган ёки ёзиб борадиган дафтари.

Махзум домланинг хотира дафтарининг биринчи қисми шу билан тамом бўлди. А. Қодирий, Ғирвонлик Маллавой

Шикоят дафтари

Савдо-сотиқ тармоқлари ва бошқа ташкилотларда мижозлар, фуқаролар ўз шикоят ва таклифларини қайд этиши учун жорий қилинган дафтар.

Шикоят дафтарини талаб қилса, тўрт эллик қоғозга дардингизни ёзинг, кимга десангиз, элтиб бераман, деди. Муштум

Ҳисоб дафтари

Шахсларнинг исм, фамилиялари ва уларга, уларнинг иш-фаолиятига оид маълумотлар қайд этилувчи дафтар.

Тальъат уни кўриб қолди шекилли, ҳисоб дафтарини пахта устига ташлаб, чопиб тушди. Ў. Ҳошимов, Қалбингга қулоқ сол

Дунё дафтари

Тарих саҳифаси.

Шу буюк ўғлингни ардоқлаб дилдан, Халқим, таъзим этсанг арзигай тамом. Унинг номи билан бирга битилган Дунё дафтарига ўзбек деган ном. А. Орипов, Йиллар армони

Кўнгил дафтари

Дилдаги армонлар, дард-ҳасратлар.

Хатдир кўнгил дафтари, хатдир севги каптари Ё. Мирзо, Ўғил меҳри
Кўнгил дафтарининг олтин бетига Бебаҳо, нашъали чечак тақдингиз. Ғайратий.

Темир дафтар

Умр (ёки ҳаёт) дафтари

Умр онлари, таржимаи қол; хотиралар.

Мелихон она умр дафтарини варақлади. Газетадан
Билсин: ҳаёт дафтарига у Ўчмас қилиб мангу битилган. Шуҳрат, Ёшлигимнинг давоми

(Ҳасрат) дафтари

Очилди Ҳасрати бошланди.

Шу баҳона билан унинг дафтари очилиб кетди. Ҳ. Назир, Узр, отахон.
Нотаниш жувоннинг ранги оқариб, ҳасрат дафтари очилиб кетди. И. Раҳим, Чин муҳаббат
— Дафтаримни очиб нима қиласиз? — деди енгил хўрсиниб Гуландом. Ойбек, Танланган асарлар

ДАФТАР сўзининг синонимларини Sinonim.uz сайтида қидириб кўринг.

DAFTAR сўзининг лотинча ёзилиши Lotin.uz сайти томонидан тақдим қилинган.

Рўйхатга қўшиш

Сайтдаги ўрни

2158

Сўзнинг тескари ёзилиши

ратфад

Ҳарфлар сони

Кўришлар сони

1603