Izoh.uz saytida bit so‘zining izohi va ma’nolari

bit

So‘zni do‘stlar
bilan ulashing

fe’l

bit (I)
bit (II)
bit (III)

1. Soʻngiga, oxiriga, nihoyasiga yetmoq, tamom boʻlmoq, tugamoq; toʻxtamoq.

Gap bitdi. Tilak bilan bitmagan bilim bilan bitar. Maqol
Katta Fargʻona kanali qirq besh kunda — 15 sentyabrda bitdi. N. Safarov, Olovli izlar

2. Tayyor boʻlmoq (qurilayotgan, yasalayotgan narsa haqida).

Qurilish bitdi. Koʻprik bitdi.
Mana, kanal ham bitay deb qoldi. A. Qahhor, Qoʻshchinor chiroqlari
[Tilla uzuk] Buyurdim, erta-indin bitib qolar. A. Qodiriy, Oʻtgan kunlar

3. Barham topmoq, yoʻq boʻlmoq, yoʻqolmoq; bartaraf boʻlmoq, tugamoq.

— Uh! — toqatsizlanib kuyindi Ahmad Husayn. — Qachon bu yovuzlar, xoinlar bitadi?! Oybek, Nur qidirib
Xalq tovushi tinimsiz guvullaydi: Bitsin zolim podsho! Oybek, Tanlangan asarlar
Barcha yomonlik oʻshaning [Musulmonqulning] boshi bilan birga ketgandek, qipchoq ogʻaynilar ila totuvlashdik, qipchoqning eski adovatlari bitdi. A. Qodiriy, Oʻtgan kunlar

4. -(i)

Kichikroq vodiyning har yer-har yeridan quyuq tutun koʻtarilmoqda — qishloq batamom yonib bitgan. A. Qahhor, Oltin yulduz
Qizim, dadang, enang hasratingda kuyib bitdi. Oybek, Tanlangan asarlar
Bechora qiz otaga muhtoj. Otasiz ezilib bitmasa yaxshi edi. I. Rahim, Ixlos

bit soʻzi qatnashgan jumlalar:

Ish bitdi

1. Ish tugadi, ish tamom boʻldi.

Erinchoqning ishi bitmas. Maqol
Oʻychining uyi bitguncha, tavakkalchining ishi bitadi. Maqol

2. Ish, reja, maqsad amalga oshdi, murod hosil boʻldi.

[Boy oʻz-oʻziga:] Xayriyat, bu ish ham xamirdan qil sugʻurganday joʻngina bitdi. Hamza, Boy ila xizmatchi

Ishi bitdi, eshagi loydan oʻtdi

kest. Oʻz ishini bitirib olgandan keyin, xayr-maʼzurni nasiya qilib ketgan yoki avvalgi muomalasini oʻzgartirib yuborgan odam haqida.

Ish bitib, eshak loydan oʻtgandan keyin zoʻravonlar chiqib, yerlarni talab oladigan boʻlsa, buning oqibati yomon boʻladi. M. Ismoiliy, Fargʻona tong otguncha

Kuni (yoki umri) bitmoq

Umri tugamoq; oʻlmoq.

Men nima qilsam, ilm uchun, ilm yoʻlida qilaman. Kunim bitib oʻlsam, oʻligimni ham ilm yoʻliga beraman A. Qahhor, Asarlar
Yaxshiboyevning kuni bitgan, aniqrogʻi, yana bir kunlik umri qolgan. M. M. Doʻst, Lolazor
Ular odamlarni xonavayron qilayotgan urush ekanini, agar urush bitsa, hamma yoq yaxshi boʻlib ketishini soʻzlardilar. P. Tursun, Oʻqituvchi

1. Oʻsib-unmoq; yetishmoq.

Mana shu yuqoriga koʻtarilgan daryodan Mirzachoʻl suv ichadi, ekin bitadi. Oydin, Shirin keldi
Omad kelsa, daraxtda ham non bitar. Qanotli soʻzlar

2. Et unib, birikib tuzalmoq, toʻlishmoq yoki bekilmoq.

Jarohatlarim bitib ketishi bilan, oʻz qismimga qaytib bordim. Nazarmat, Joʻrlar baland sayraydi
Sal kunda Aʼzamga et bitib, rangiga qon yugurdi. Shuhrat, Jannat qidirganlar

bit soʻzi qatnashgan jumlalar:

Jir bitdi

Endi jir bitdi-da! Bitta koʻylak ikkita boʻldi! A. Qahhor, Qoʻshchinor chiroqlari

Izzati bitmoq

Hurmatini bilmaslik, koʻrsatilgan izzat-hurmat qadriga yetmaslik.

-Bas! Izzating bitdi, doya buvingga borib ayt! Agar ozodlik keltirmasang, yangi saboqqa tushmaysan! — dedi [domla]. N. Safarov, Sulton boʻzchining nevaralari

Qulogʻi bitmoq

1. Qulogʻi garang boʻlmoq, batangga kelmoq.

Xayr, yumushingiz boʻlmasa, men ketdim, shamoldan qulogʻim bitdi. A. Qodiriy, Mehrobdan chayon
Laʼli nima qilishini bilmay, bolalar shovqinidan qulogʻi bitib turadi. H. Gʻulom, Mashʼal

2. Eshitaverib charchamoq, jonidan toʻymoq. Qulogʻi tom bitmoq Eshitmaydigan, pay-qamaydigan boʻlib qolmoq.

Shu daqiqadan boshlab, Suyarqulning quloqlari tom bitdi. Tanaffus boshlanishini ham hammadan keyin — sinfda gʻovur-gʻuvur boshlanganda bildi. A. Koʻchimov. Halqa, Haqi bitdi Haqi qolma-di
Ilgarigi soʻzingiz bilan oʻzingizning haqqingiz bitganligini bila turib ham, yana uyalmay-netmay, vijdonsizlar amrini berib qoʻyasiz-da, uyatsizligingizni yana bir qat orttirasiz! A. Qodiriy, Oʻtgan kunlar

1. aynan Yozmoq. II.

Yurtim, senga sheʼr bitdim bu kun, Qiyosingni topmadim aslo. A. Oripov, Yurtim shamoli
Xoʻja Abdulla Marvoriy xatni chiroyli bitardi. Oybek, Navoiy
Roʻyob Mamatova Mirzachoʻlni oʻzlashtirib, oʻz jasorati sol-nomasiga ilk satrlarini bitganda, yoshgina qizcha edi. Oʻzbekiston qoʻriqlari

2. (joʻnalish kelishigi bilan) Muyassar, ega boʻlmoq; paydo boʻlmoq.

Mana, xudo xohlasa, boshingga doʻppi, oyogʻingga etik, egningga chopon, koʻylak-ishton bitadi. P. Tursun, Oʻqituvchi

bit soʻzi qatnashgan jumlalar:

Aql bitmoq

Aql kirmoq.

Bu nimasi tagʻin senga sira aql bitmadi. Boʻyingni qara, menga yetay deb qoldi. Oydin, Oʻzi monand. Boshga bitgan balo Qutulish qiyin boʻlgan tashvish, quruq tashvishdan iborat.
He, bu urush boshga bitgan balo boʻldi-da. German ham qursin oq poshsho ham qursin. Enasining mahrini talasharmikan! Oybek, Tanlangan asarlar

Muguz (yoki shox, qanot va shu kabilar) bitdi

Muguz (shox, qanot va shu kabilar) paydo boʻldi.

Eshakka muguz bitsa, jami jonivorlarni suzib oʻldirar ekan, mushukka qanot bitsa, hech bir parrandani qoʻymas ekan. P. Tursun, Oʻqituvchi
Qay bola maktabda oʻqisa aʼlo, Oʻshanga hech tolmas zoʻr qanot bitar. Q. Muhammadiy.
Hojar opaning gap ohangidan yon berganini sezib, Rasul akaga qanot bitdi. Oʻzbekiston qoʻriqlari

Peshonaga bitgan (yoki bitib qoʻyilgan)

eskirgan Taqdirda bor, taqdirda belgilab qoʻyilgan.

[Yusuf:] Mana, xotindan ham ayrildik! — [Mehri:] Nima qilay, bu ham boʻlsa, peshonaga bitgan bir koʻrgilik, bolam. O. Yoqubov, Aytsam tilim kuyadi, aytmasam — dilim
Peshonaga bitgan yolgʻiz ot edi. Uni ham oʻrtaga qoʻyaymi? P. Tursun, Oʻqituvchi

BIT so‘zining sinonimlarini Sinonim.uz saytida qidirib ko‘ring.

БИТ so‘zining kirillcha yozilishi Lotin.uz sayti tomonidan taqdim qilingan.

Saytdagi o‘rni

2535

So‘zning teskari yozilishi

tib

Harflar soni

Ko‘rishlar soni

1244

bit so‘zi ishlatilgan saytlarni internetda qidiring

Google Яндекс Bing

Siz uchun qiziq bo‘lishi mumkin bo‘lgan so‘zlar

Boburnoma Zulfiyaxonim achchiqlantir abad abajur aʼzo Mars Neptun abjirlik

bit so‘zining ma’nosi va izohi bilan batafsil tanishib chiqamiz. O‘ylaymizki, endi siz Izoh.uz saytidan foydalanib, bit so‘zini lotin va kirill alifbosida to‘g‘ri va o‘z o‘rnida ishlata olasiz.